معاون خصوصی برائے اطلاعات شہباز گل نے کہا ہے کہ موجودہ حکومت کے درست فیصلوں کے مثبت اور درست نتائج مرتب ہو رہے ہیں۔

تفصیلات کے مطابق سماجی رابطے کی ویب سائٹ پر اپنے ایک پیغام میں معاون خصوصی برائے اطلاعات شہباز گل نے ملک کی معاشی ترقی کے حوالے سے بات کی ہے۔

معیشت کی درست سمت اور اس پر عالمی معاشی اداروں کا اظہارِ اطمینان اس بات کی دلیل ہے کہ اپوزیشن کا معیشت کے حوالے سے منفی پروپیگنڈا صرف اور صرف انکے بغض و عناد کی وجہ سے ہے۔
اور یہ NRO دلاؤ اتحاد ہرصورت ملک میں انتشار،اداروں میں ٹکراؤ اورجمہوری عمل کو سبوتاژ کرنےمیں سرگرم ہے

— Dr. Shahbaz GiLL (@SHABAZGIL) March 20, 2021

اپنے پیغام میں شہباز گل کا کہنا تھا کہ وزیراعظم عمران خان کے معیشت کیلئے کیے گئے سخت لیکن درست فیصلوں کے مثبت اور درست نتائج مرتب ہو رہے ہیں۔

انہوں نے کہا ہے کہ اسٹیٹ بینک کے مطابق نظر ثانی شدہ GDP کی شرح اس سال تقریباً 2 سے بڑھ کر 3 فیصد جبکہ IMF اور موڈیز کے مطابق اگلے سال پاکستان کی GDP گروتھ 4 فیصد سے زیادہ ہوسکتی ہے۔

شہباز گل کا کہنا تھا کہ ملکی معیشت کی درست سمت اور اس پر عالمی معاشی اداروں کا اظہارِ اطمینان اس بات کی دلیل ہے کہ اپوزیشن کا معیشت کے حوالے سے منفی پروپیگنڈا صرف اور صرف انکے بغض و عناد کی وجہ سے ہے۔