پاکستان مسلم لیگ ن کے رہنما احسن اقبال نے کہا ہے کہ حکومت کی جانب سے جھوٹے کیسز دائر کر کے اپوزیشن کی کردار کشی کی جا رہی ہے۔

پاکستان مسلم لیگ ن کے رہنما احسن اقبال نے میڈیا سے بات چیت کرتے ہوئے کہا ہے کہ احتساب عدالتوں میں اپوزیشن اور مسلم لیگ ن کیخلاف جھوٹے کیسز دائر کئے گئے ہیں۔

احسن اقبال کا کہنا تھا کہ اب تک نیب ریفرنس میں میرے خلاف مالی بدعنوانی کا کوئی الزام نہیں ہے لیکن ہمارا قصور پاکستان کی ترقی کو نیوٹرل گئیر سے نکالنا ہے اور ترقی کے منصوبے بنانا ہے۔

انہوں نے کہا ہے کہ اناڑی، جاہل اور ناکام حکومت نے دوبارہ ملک کو لوڈشیڈنگ میں دھکیل دیا ہے۔

انہوں نے مزید کہا ہے کہ اس نالائق حکومت سے پاکستان کا ڈھانچہ تباہ ہورہا ہے اور چند افراد صرف اپنی تجوریاں بھر رہے ہیں جس سے غریب مزید تباہی کی طرف جارہا ہے۔

احسن اقبال نے کہا ہے کہ آج دنیا کی ساتویں ایٹمی طاقت کو دنیا کے سامنے تماشا بنا دیا گیا ہے اور ہمارے اس وزیراعظم کو تقریر اور چندہ اکٹھا کرنے کے علاوہ کچھ نہیں آتا ہے۔

ان کا کہنا تھا کہ عمران نیازی کی منافقت، جھوٹ اور دو غلا پن کھل کر سامنے آ گیا ہے کیونکہ عمران یہ کہتے نہیں تھکتے تھے کہ مولانا ڈیزل کرپٹ ہے اور اب کس منہ سے غفور حیدری کو پیش کش کر رہے ہیں؟

انہوں نے کہا ہے کہ عمران خان صرف ایک دھوکہ ہے اور نوجوان نسل کو اب عمران خان کے بہکاوے سے نکالنا ہوگا۔