وفاقی وزیر برائے آئی ٹی امین الحق نے کہا ہے کہ وزیر اعظم عمران خان کا ویژن ڈیجیٹل پاکستان ہے اور ہماری ترجیح بلاتعطل کنیٹکویٹی ہے۔

تفصیلات کے مطابق وفاقی وزیر آئی ٹی سید امین الحق نے پریس کانفرنس کرتے ہوئے جاری منصوبوں کے حوالے سے آگاہ کیا ہے۔

وفاقی وزیر امین الحق کا کہنا تھا کہ کنیکٹویٹی کا مسئلہ زیادہ دیہی علاقوں میں ہے، اس کے لئے وزارت آئی ٹی نے انقلابی فیصلہ کیا ہے جس سے تمام علاقوں میں کنیکٹویٹی فراہم کی جائے گی۔

امین الحق نے کہا ہے کہ 31 ماہ کے دوران موجودہ حکومت نے 22 ارب روپے کنیکٹویٹی کے منصوبوں پر خرچ کئے ہیں جبکہ گزشتہ 6 ماہ میں یو ایس ایف نے 15 نئے منصوبوں کا آغاز کیا ہے۔

انہوں نے بتایا کہ ہائی ویز پر رابطوں کا مسئلہ ہے اسکے لئے ایم تھری سے ایم 5 تک 13 سو کلومیٹر شاہراہوں پر رابطوں کے لئے معاہدے ہوچکے ہیں۔

انہوں نے بتایا ہے کہ کویڈ 19 وباء کی وجہ سے گزشتہ سال مارچ میں لاک ڈاؤن کیا گیا جس کو وزارت آئی ٹی نے ایک موقع کے طور پرلیا اور اس دوران 40 فیصد آئی ٹی ایکسپورٹ بڑھا ہے۔

وفاقی وزیر نے کہا ہے کہ ملک میں سافٹ ویئر ٹیکنالوجی پارک اور آئی ٹی پارک بنائے جارہے ہیں اور اس ماہ اسلام آباد میں پہلے سرکاری آئی ٹی پارک کا سنگ بنیاد رکھا جارہا ہے جو کہ 3 سال میں یہ آئی ٹی پارک مکمل کیا جائے گا۔

انہوں نے مزید کہا ہے کہ ملک بھر میں سیاحت کے مقامات پر رابطوں کو بڑھانے کے منصوبے کے تحت سیاحتی مقامات پر سسٹم اپ گریڈ کررہے ہیں اور کوشش ہے کہ یہ منصوبہ جون تک مکمل ہوجائے۔