وزیر خارجہ  شاہ محمود قریشی کی افغان صدر اشرف غنی سے ملاقات ہوئی ہے۔

تفصیلات کے مطابق   وزیر خارجہ شاہ محمود قریشی کی  دوشنبے میں منعقدہ نویں ’ہارٹ آف ایشیا ء  استنبول پراسس‘کانفرنس کے موقع پر افغان صدر اشرف غنی سے ملاقات ہوئی ہے۔

دوران ملاقات پاک، افغان دو طرفہ تعلقات اور افغان امن عمل سمیت باہمی دلچسپی کے مختلف امور پر تبادلہ خیال کیا گیا۔

شاہ محمود قریشی کا کہنا تھا کہ  خطے، بالخصوص افغانستان میں قیام امن  کے لیے کی جانے والی کاوشوں میں ’ہارٹ آف ایشیا ءاستنبول پراسس ‘ کے وزارتی اجلاس کا انعقاد ایک مثبت اور احسن اقدام ہے ۔

وزیر خارجہ نے کہا کہ پرامن اور مستحکم افغانستان، پاکستان کے مفاد میں ہے۔ پاکستان خطے میں امن  کے لیے کی جانے والی کاوشوں میں شراکت دار ہے۔

انہوں نے مزید کہا کہ پاکستان خطے کے امن و استحکام  کے لیے افغانستان میں قیام امن کو ناگزیر سمجھتا ہے۔ ہمیں افغانستان میں تشدد کے بڑھتے ہوئے واقعات پر تشویش ہے ۔

شاہ محمود قریشی نے کہا کہ  پاکستان کا ہمیشہ سے موقف رہا ہے کہ افغان مسئلے کو طاقت کے ذریعے حل نہیں کیا جاسکتا ۔پاکستان جامع مذاکرات کے ذریعے ہی افغان مسئلے کے سیاسی حل کا حامی ہے۔

وزیر خارجہ کا کہنا تھا کہ بین الافغان مذاکرات کے نتیجے میں مثبت پیش رفت، افغان امن عمل کو منطقی انجام تک پہنچانے میں معاون ثابت ہو سکتی ہے۔

انہوں نے کہا کہ پاکستان افغان امن عمل سمیت  خطے میں امن  کے لیے اپنی مخلصانہ کاوشیں جاری رکھنے  کے لیے پر عزم ہے۔

افغان صدر اشرف غنی نے وزیر اعظم عمران خان کی جلد صحت یابی کے لیے نیک خواہشات کا اظہار کیا۔