لاہور موٹروے زیادتی کیس  کے ملزمان کو سزائے موت سنادی گئی۔

تفصیلات کے  مطابق   انسداد دہشتگردی عدالت کے جج  ارشد حسین بھٹہ  نے  لنک روڈ زیادتی کیس کا فیصلہ سنا دیا ۔

عدالت نے زنا بالجبر  کے الزام میں عابد ملہی اور شفقت علی کو موت کی سزائیں سنا دیں۔

عدالت نے اغواء کے الزام میں عمر قید اور ڈکیتی کا الزام ثابت ہونے پر 14 سال قید کی سزا سنائی۔  عابد ملہی اور شفقت علی پر 50، 50 ہزار روپے جرمانہ بھی عائد کیا  گیا ہے۔

عدالت نے ملزموں کی منقولہ و غیر منقولی جائیدادیں بحق سرکار ضبط کرنے کا بھی حکم دے دیا اور  جان سے مارنے کی کوشش کرنے کا الزام ثابت ہونے پر 5، 5 سال قید کی سزا بھی سنائی ہے۔

مجرم عابد ملہی اور شفقت علی کو کیس کا فیصلہ سننے کیلئے عدالت میں پیش کیا گیا تھا۔

مجرموں کی سزا کا فیصلہ سناتے ہوئے پراسیکیوشن کی ٹیم بھی کمرہ عدالت میں موجود رہی۔

واضح رہے کہ 9 ستمبر کو لاہور کے علاقے گجر پورہ میں موٹر وے پر خاتون کو اجتماعی زیادتی کا نشانہ بنانے کا واقعہ پیش آیا تھا۔

ایف آئی آر کے مطابق ایک خاتون اپنے تین بچوں کے ہمراہ  گجرانوالہ سے لاہور جارہی تھیں، راستے میں گاڑی کا پیٹرول ختم ہونے کی وجہ سے انہیں سڑک کنارے رکنا پڑا۔

خاتون نے اپنے ایک رشتے دار کو فون کیا، رشتے دار نے موٹر وے پولیس کو فون کرنے کا کہا۔ خاتون نے موٹروے پولیس کو فون کیا مگر موٹر وے پولیس نے مبینہ طور پر کہا کہ کوئی ایمرجنسی ڈیوٹی پر نہیں ہے۔

اسی اثناء میں  دو افراد نے موٹر وے پر کھڑی گاڑی کا شیشہ توڑ کر خاتون اور اس کے بچوں کو باہر نکالا، موٹر وے کے گرد لگی جالی کاٹ کر سب کو قریبی جھاڑیوں میں لے گئے اور پھر خاتون کو بچوں کے سامنے زیادتی کا نشانہ بنایا اور نقدی و قیمتی سامان چھین لیا۔