وزیر خارجہ شاہ محمود قریشی  کا کہنا ہے کہ  یورپی ممالک ہمارے سب سے بڑے تجارتی اتحادی ہیں۔

تفصیلات کے مطابق  وزیر خارجہ شاہ محمود قریشی  نے وزارت خارجہ میں پاکستان میں تعینات یورپی ممالک کے سفراء سے ملاقات کی۔

اس موقع پر وزیر خارجہ نے کہا کہ  یہ معاشی سفارت کاری کے حوالے سے ہماری دوسری ملاقات ہے ،  میں آپ کو وزارت خارجہ میں تشریف آوری پر خوش آمدید کہتا ہوں ۔

شاہ محمود قریشی نے کہا کہ  میں اس سے قبل یورپی ممالک میں تعینات پاکستانی سفراء کے ساتھ اس حوالے سے دو ورچوئل میٹنگز کر چکا ہوں ۔

انہوں نے کہا کہ  یورپی ممالک ہمارے سب سے بڑے تجارتی اتحادی ہیں ۔پاکستان میں سرمایہ کاری کے بہترین مواقع موجود ہیں۔

وزیر خارجہ نے مزید کہا کہ  کورونا وباء کی وجہ سے معاشی مشکلات کے باوجود یورپی کمپنیوں کی جانب سے پاکستان میں سرمایہ کاری کے حجم میں خاطر خواہ اضافہ ہوا ہے ،ہماری دو طرفہ تجارت کو فروغ ملا ہے ۔

Pleased to pursue series of virtual meetings w/ 🇵🇰 envoys across the world focussing on #economicdiplomacy. This iteration, continued second round of meetings w/ our ambassadors in #Europe, working closely to build and strengthen areas to champion Pakistan’s economic interests. pic.twitter.com/Mey4cbwPMS

— Shah Mahmood Qureshi (@SMQureshiPTI) March 4, 2021

شاہ محمود قریشی کا کہنا تھا کہ  پاکستانیوں کی ایک بڑی تعداد یورپی ممالک میں مقیم ہے جو ہمارے دو طرفہ اقتصادی روابط کے فروغ میں معاون ثابت ہو سکتے ہیں ۔

انہوں نے کہا کہ میں نے  اپنی ورچوئل میٹنگز میں یورپی ممالک میں تعینات پاکستانی سفراء کو ہدایت کی کہ وہ یورپی ممالک میں دو طرفہ تجارت کے میسر مواقعوں کے حوالے سے آگاہ کریں تاکہ یورپی ممالک کے ساتھ تجارتی تعلقات کو مزید مستحکم بنایا جا سکے ۔

وزیر خارجہ کا کہنا تھا کہ  ہم ای اے ڈی کے ذریعے 2021 کا پلان ترتیب دے رہے ہیں تاکہ یورپی ممالک کے ساتھ مشترکہ اقتصادی کمیشنز کو مزید فعال اور بامقصد بنایا جا سکے ۔

شاہ محمود قریشی نے کہا کہ  ہم یورپی ممالک کے کاروباری حضرات کو ای ویزہ سہولت مہیا کرنے کے ساتھ ساتھ، ان کو ہر ممکن سہولت فراہم کرنے کے لیے کوشاں ہیں ۔

وزیر خارجہ نے کہا کہ پاکستان – یو رپ مشترکہ اقتصادی کمیشن، ہمارے دو طرفہ مضبوط اقتصادی روابط کا مظہر ہے ۔ ہماری ان کاوشوں کے باعث  کاروبار میں سہولت فراہم کرنے کی عالمی رینکنگ میں پاکستان کی درجہ بندی 39 درجے تک بڑھی ہے ۔

شاہ محمودقریشی نے مزید کہا کہ  اقتصادی تعاون کا فروغ، دو طرفہ تعلقات کو مستحکم بنانے میں اہم کردار ادا کرتا ہے ۔

ان کا کہنا تھا کہ   ہم نے ٹیکنالوجی کو بروئے کار لاتے ہوئے’روشن دیجیٹل اکاونٹ‘کا اجراء کیا ۔  اس اقدام کے نتیجے میں پاکستانی تارکین وطن نے پہلے چند ماہ میں 50 ملین ڈالر زر مبادلہ بھجوایا ۔