وزیر خارجہ شاہ محمود قریشی نے کہا ہے کہ پاکستان، ازبکستان کو وسط ایشیائی ممالک میں ایک اہم برادر ملک سمجھتا ہے۔

تفصیلات کے مطابق ازبکستان کے وزیر خارجہ جناب عبدالعزیز کامیلوو کی وزارتِ خارجہ میں وفد کے ہمراہ وزیر خارجہ شاہ محمود قریشی سے ملاقات سے ملاقات ہوئی ہے۔

ملاقات میں دونوں وزرائے خارجہ نے پاکستان اور ازبکستان کے مابین دو طرفہ تجارت سمیت کثیرالجہتی شعبہ جات میں دو طرفہ تعاون کے فروغ پر اتفاق کیا ہے۔

شاہ محمود قریشی نے کہا کہ پاکستان اور ازبکستان کے درمیان عقیدہ، مشترکہ تاریخ اور ثقافتی ہم آہنگی پر مبنی خوشگوار تعلقات استوار ہیں جوکثیرالجہتی شعبہ جات میں دوطرفہ تعلقات کے فروغ کے لئے مضبوط بنیاد فراہم کرتے ہیں۔

شاہ محمود قریشی نے کہا ہے کہ دونوں ممالک علاقائی روابط بڑھانے اور خاص طورپر پاکستان، افغانستان اور ازبکستان کے درمیان ٹرانس افغان ریلوے منصوبے کی جلد تعمیر کے لئے قریبی تعاون جاری رکھے ہوئے ہیں ۔

ازبک وزیر خارجہ عبدالعزیز کامیلوف نے خطے میں روابط کے فروغ اور قیام امن کیلئے پاکستان کی کاوشوں کو سراہا اور توقع ظاہر کی ہے کہ ازبک وزیر خارجہ کامیلوف کے حالیہ دورہ ء پاکستان سے دو طرفہ روابط کی رفتار مزید بڑھانے میں مدد ملے گی جبکہ باہمی مفاد کے شعبوں میں موجود دوطرفہ تعاون کو مزید مضبوط اور مستحکم بنانے میں مدد ملے گی ۔