بول نیوز کی درخواست پر عدالت  نے چیئرمین پیمرا کو طلب کرلیا۔

تفصیلات کے مطابق  چیئرمین  پیمرا  نے اوچھے ہتھکنڈے اپناتے ہوئے  غیر قانونی طور پر بول چینلز کو ہٹانے یا دوسرے نمبروں پر لگانے کی سازش رچائی ۔

بول نیوز نے پولیس کو درخواست دینے کے بعد عدالت سے رجوع کیا۔

عدالت نے چیئرمین پیمرا اور پیمرا انتظامیہ کو ذاتی طور پر پیش ہونے کا حکم دیتے ہوئے ایس ایچ او زمان ٹاؤن کو پابند کیا کہ سب کی حاضری یقینی بنائیں۔

عدالت کے پوچھنے پر بول انتظامیہ نے تمام کیبل آپریٹرز کے نام بتا دیے۔

مقدمہ درج کرنے کی درخواست لبیک پرائیوٹ لمیٹڈ کے مجاز آفیسر اظہر شمیم نے جمع کرائی تھی۔

درخواست میں موقف اپنایا گیا کہ   بول کے چینلز کے خلاف چیئرمین پیمرا غیر قانونی کام کررہے ہیں۔ 3 فروری کو سلیم بیگ نے خود کیبل آپریٹرز کو بول چینلز کو بند کرنے کی غیرقانونی ہدایات جاری کیں ۔چیئرمین پیمرا کا یہ اقدام مجرمانہ فعل ہے۔

درخواست میں مزید کہاگیا کہ پیمرا کے ریجنل ڈائریکٹر کے ذریعے بھی کیبل آپریٹرز کو کہا گیا کہ بول چینلز کو بند کرو یا آخری نمبروں پر کردو۔ ہائی کورٹس نے بھی بول نیوز کے خلاف پیمرا کو کسی بھی کارروائی سے روک رکھا ہے۔

کیبل آپریٹر کے وکیل نے کہا کہ  بول نیوز کی جانب سے کیا جانے والا یہ کیس بنتا ہی نہیں جس پر عدالت کا کہنا تھا کہ  کیس بلکل میرٹ پر ہے۔

درخواست میں عدالت سے استدعا کی گئی ہے کہ نامزد ملزمان کے خلاف قانون کے مطابق کارروائی عمل میں لانے کا حکم دیا جائے۔

عدالت نے دونوں فریقین سے 10 مارچ کو دلائل طلب کرلیے ہیں۔

عدالت نے حکم دیا ہے کہ  10 مارچ کو عدالت میں پیش ہوں ورنہ ایف آئی آر درج کرنے کے احکامات دیں گے۔