معاون خصوصی برائے صحت ڈاکٹر فیصل سلطان نے کہا ہے کہ کورونا وباء کے باعث جو پابندیاں لگائی گئیں اس پرصحیح طریقے سےعمل نہیں ہورہا ہے جس کے باعث کورونا کے کیسز میں اضافہ ہورہا ہے۔

معاون خصوصی برائے صحت ڈاکٹر فیصل سلطان نے بتایا ہے کہ ملک بھر میں کورونا وباء کی تیسری لہر کے باعث ہیلتھ سسٹم پر شدید دباؤ ہے جبکہ 4200 سے زائد مریضوں کی حالت تشویشناک ہے۔

ڈاکٹر فیصل سلطان نے کہا ہے کہ ملک بھر میں کاروبار بند کرنے کے اوقات کار پر عملدرآمد نہیں کیا جارہا ہے جبکہ ریسٹورنٹس میں ان ڈور ڈائننگ بھی جاری ہے اور ان سب میں ماسک کا استعمال 5 فیصد بھی نہیں ہے۔

انہوں نے کہا ہے کہ عوام ماسک کے استعمال کو سنجیدہ لیں کیونکہ ایس او پیز پرعملدرآمد کرنے سے وباء کے پھیلاؤ میں کمی آئے گی۔

ڈاکٹر فیصل سلطان کا کہنا تھا کہ ملک بھرمیں ویکسینیشن کاعمل جاری ہے تاہم ویکسین لگوانے کے بعد بھی احتیاطی تدابیر پر بھی عمل کرنا لازمی ہے۔

انہوں نے مزید کہا ہے کہ رمضان المبارک میں احتیاطی تدابیر کے سلسلے میں علمائے کرام کے تعاون سےعوام میں آگاہی پھیلانے میں مدد ملے گی۔

 ان کا کہنا تھا کہ رمضان المبارک کے سلسلے میں علمائے کرام وباء کے حوالے سے آگاہی اور احتیاطی تدابیر اختیار کرنے میں اپنا بھرپور کردار ادا کریں۔