صدر  مملکت ڈاکٹر عارف علوی کا کہنا ہے کہ    پاکستان فلسطینیوں کے خلاف اسرائیلی تشدد اور غیر قانونی اقدمات کی پرزور مذمت کرتا ہے۔

تفصیلات کے مطابق  صدر مملکت ڈاکٹر عارف علوی  نے موجودہ کشیدہ صورتحال  کے پیش نظر فلسطین کے صدر محمود عباس کے نام خط لکھا ہے۔

خط میں صدر مملکت  نے رمضان المبارک میں قابض اسرائیلی فوج کی جانب سے مسجد اقصیٰ پر متشدد حملوں پر اظہارِ تشویش کیا گیا۔

ڈاکٹر عارف علوی نے خط میں لکھا کہ معصوم بچوں اور فلسطینیوں کے قتل پر آپ کے پاکستانی بہن بھائی آپ کے دکھ میں برابر کے شریک ہیں۔

صدر مملکت  نے حملوں میں شہید ہونے والوں  کے لیے اظہارِ افسوس اور زخمیوں کی جلد صحتیابی  کے لیے دعا بھی کی۔

ڈاکٹر عارف علوی نے لکھاکہ  اسرائیلی اقدامات انسانی حقوق، بین الاقوامی قوانین اور اِنسانی اقدار کے خلاف ہیں۔ ہم فلسطینیوں کے حقوق  کے لیے آواز بلند کرتے رہیں گے۔

انہوں نے خط میں مزید لکھا کہ  ہم فلسطین کے حقوق  کے لیے بین الاقوامی برادری کو متحرک کرنے  کے لیے اپنی کوششیں جاری رکھیں گے اور پاکستان مسئلہ فلسطین کے منصفانہ حل  کے لیے اپنی غیر متزلزل حمایت جاری رکھے گا۔

صدر مملکت نے خط میں لکھا کہ  پاکستان سیکیورٹی کونسل کی قراردادوں کے مطابق اور ایک آزاد، پائیدار اور جغرافیائی طور پر متصل فلسطینی ریاست کا حامی ہے۔

ڈاکٹر عارف علوی نے خط میں لکھا کہ  پاکستان 1967 سے قبل کی سرحد اور القدس شریف  کے بطور فلسطینی دارالحکومت کا حامی ہے۔

صدر مملکت  نے خط میں فلسطینی صدر اور عوام  کے لیے نیک خواہشات کا  بھی اظہار کیا۔