پاک چین سفارتی تعلقات کو 70 سال مکمل ہونے کے موقع پر دونوں ممالک کے وزرائے اعظم نے ایک دوسرے کو خطوط لکھے گئے ہیں۔

وزیراعظم عمران خان نے چینی وزیراعظم کے نام اپنے خط میں انہیں اپنی، حکومت اور پاکستان کے عوام کی طرف سے دونوں ملکوں کے مابین سفارتی تعلقات کی 70 ویں سالگرہ کی مبارکباد پیش کی ہے۔

وزیراعظم نے کہا ہے کہ 21 مئی وہ دن ہے جب پاکستان اور چین کے مابین سفارتی تعلقات باقاعدہ استوار ہوئے، یہ ہماری تاریخ کا ایک اہم سنگ میل ہے۔

وزیراعظم نے کہا کہ دونوں ملکوں کی حکومتیں سفارتی تعلقات کی سالگرہ کو بہتر طریقے سے منانے کیلئے ایک دوسرے کے ساتھ قریبی رابطے میں ہیں اور اس سے ہمارے عوام پاک چین تعلقات کی گہرائی، وسعت اور ولولے کو حقیقی معنوں میں سمجھنے کے قابل ہونگے۔

چین کے وزیراعظم لی کی چیانگ نے بھی وزیراعظم عمران خان کو لکھے گئے خط میں پاکستان اور چین کے سفارتی تعلقات کے قیام کی 70 ویں سالگرہ پر انہیں مبارکباد دی اور کہا کہ چین اور پاکستان دوست ہمسائے ہیں اور دونوں ایک دوسرے کے ساتھ پہاڑوں اور دریاؤں کے ذریعے ملے ہوئے ہیں۔

 انہوں نے کہا کہ کووڈ۔19 کی وباء کے دوران چین اورپاکستان نے مشکلات پر قابو پانے میں ایک دوسرے کی مدد کی ہے اور چین پاکستان اقتصادی راہداری کی ترقی کیلئے کوشاں رہے ہیں۔