چیئرمین نیب جسٹس (ر) جاوید اقبال نے کہا ہے کہ ہمارے مفادات اور وفاداریاں پاکستان اور پاکستانی عوام سے ہیں۔

تفصیلات کے مطابق چیئرمین نیب جسٹس (ر) جاوید اقبال کی زیر صدارت اعلیٰ سطحی اجلاس منعقد ہوا جس میں نیب کی مجموعی کارکردگی کا جائزہ لیا گیا۔

چیئرمین نیب جسٹس (ر) جاوید اقبال نے اجلاس کی صدارت کرتے ہوئے کہا کہ نیب ملک اور قوم کی دولت لوٹنے والے بد عنوان عناصر کو قانون کے مطابق منطقی انجام تک پہنچانے کے لئے پر عزم ہے۔

چیئرمین نیب نے کہا کہ نیب کے پاس بد عنوان عناصر کے خلاف اربوں روپے کی منی لانڈرنگ،فیک بینک اکاؤنٹس، آمدن سے زائد اثاثے، اختیارات کا ناجائز استعمال کرتے ہوئے قومی خزانے کو نقصان پہنچانے اور غیر قانونی ہاؤسنگ سوسائٹیز کے ذریعے قوم کے اربوں روپے لوٹنے والوں کے خلاف ٹھوس شواہد موجود ہیں۔

جاوید اقبال نے کہا کہ ملکی ترقی میں تاجر برادری کا کردار انتہائی اہم ہے، نیب کے کسی اقدام سے تاجر برادری کیلئے مشکلات پیدا نہیں ہوئیں۔

چیئرمین نیب کا کہنا تھا کہ غریب عوام کو لوٹنے والی نِجی ہاوسنگ سوسائٹیوں کیخلاف کارروائیاں جاری ہیں۔

جاوید اقبال کا یہ بھی کہنا تھا کہ جن کے پاس 1980میں کچھ نہیں تھا آج دبئی میں پلازوں کے مالک ہیں۔

چیئرمین نیب جسٹس (ر) جاوید اقبال کا مزید کہنا تھا کہ نیب مقدمات میں ان کے نام ہیں جنھوں نے اربوں کی منی لانڈرنگ کی، اربوں روپے لوٹ کر باہر جانےوالوں کو نیب کسی صورت نہیں چھوڑے گا۔