سربراہ پاک بحریہ ایڈمرل محمد امجد خان نیازی نے کہا ہے کہ ماحولیاتی نظام کی بحالی جیسے عالمی مقصد کے حصول کے لئے بڑے پیمانے پر اقدامات کی ضرورت ہے۔

ترجمان پاک بحریہ کے مطابق  ماحولیات کے عالمی دن کے موقع پر پاک بحریہ کے سربراہ ایڈمرل محمد امجد خان نیازی کا پیغام جاری کیا گیا ہے۔

پاک بحریہ کے سربراہ ایڈمرل محمد امجد خان نیازی نے اپنے پیغام میں کہا ہے کہ اس دن کا مقصد ہماری آنے والی نسلوں کیلٸے صاف ستھرا ماحول اور ایک بہتر معیارِ زندگی فراہم کرنا ہے۔

ایڈمرل محمد امجد خان نیازی نے کہا ہے کہ پاکستان میں ماحولیات کے تحفظ کیلٸے متعدد اقدامات اٹھاٸے جا رہے ہیں تاکہ انسانوں کی مختلف سرگرمیوں سے ہونے والی ماحولیاتی تباہی کو کم کیا جاسکے۔

نیول چیف نے مزید کہا ہے کہ پاک بحریہ ماحولیات خصوصاً آبی ماحولیات کی اہمیت کو اجاگر کرنے اور اس کے تحفظ کیلٸے مختلف اقدامات کر رہی ہے۔

انہوں نے کہا ہے کہ کورونا وائرس کے پھیلاؤ سے ثابت ہوا کہ ماحولیاتی نظام میں تغیر کے نتائج تباہ کن ہو سکتے ہیں اور آج کے دن ہم صاف ستھرے اور محفوظ ماحول کو یقینی بنانے کے اپنے مشترکہ عزم کی توثیق کرتے ہیں۔

انہوں نے اپنے پیغام میں بتایا ہے کہ عالمی یوم ماحولیات کی مناسبت سے پاک بحریہ کی جانب سے مختلف سرگرمیوں کا انعقاد کیا جا رہا ہے۔