نیشنل کمانڈ اینڈ آپریشنز سینٹر ( این سی او سی) کی جانب سے کاروباری مراکز کی ٹائمنگ رات 10 بجے تک کرنے کا فیصلہ کرلیا گیا ہے۔

تفصیلات کے مطابق ملک میں کورونا کی بہتر صورت حال کے پیش نظر نیشنل کمانڈ اینڈ آپریشنز سینٹر ( این سی او سی) نے تجارتی اور تفریحی سرگرمیوں میں مزید نرمی کر دی۔

این سی او سی کے مطابق پیٹرول پمپ، میڈیکل اسٹور سمیت ضروریات کے اہم کاروباری زندگی کو 24 گھنٹے کھولنے کی اجازت ہوگی۔

این سی او سی کا کہنا ہے کہ ریسٹورنٹس میں آؤٹ ڈور ڈائننگ کی اجازت ہوگی تاہم  ڈائن ان پر 50 فیصد کی پابندی عائد ہوگی اور صرف ویکسین لگوانے والے افراد ہی ان ڈور ڈائن ان کی سہولت حاصل کر سکیں گے۔

این سی او سی کے مطابق ہوٹلز اور ریسٹورنٹس انتظامیہ کی جانب سے ویکسینیشن سرٹیفیکیٹ چیک کرنے کا لائحہ عمل بنایا جائے۔

این سی او سی کا کہنا ہے کہ شادی کی تقریب آؤٹ ڈور 400 افراد کی گنجائش سے کرنے کی اجازت ہوگی جبکہ200 افراد تک ویکسینیٹڈ افراد ان ڈور شادی کی تقریب میں شریک ہوسکیں گے۔

این سی او سی کا یہ بھی کہنا ہے کہ پبلک ٹرانسپورٹ 70 فیصد کی گنجائش کے ساتھ جاری رکھنے کی اجازت ہوگی جبکہ تفریحی مقامات، سوئمنگ پول کو 50 فیصد کی گنجائش کے ساتھ کھلنے کی اجازت ہوگی۔

این سی او سی کا مزید کہنا ہے کہ تعلیمی اداروں میں موسم گرما کی چھٹیوں کے حوالے سے فیصلے صوبے کریں گے جبکہ نئی پابندیوں کے حوالے سے صورتحال کا جائزہ اجلاس 27 جولائی کو ہوگا۔