وزیراعظم کے معاون خصوصی ڈاکٹر فیصل سلطان نے کہا ہے کہ جب تک تمام شہریوں کو ویکسین نہیں لگتی پابندیاں ختم نہیں ہو سکتی ہیں۔

تفصیلات کے مطابق امریکی ادارہ برائے بین الاقوامی ترقی یو ایس ایڈ کی جانب سے پاکستان کو کورونا سے بچاؤ کے آلات دینے کی تقریب میں معاون خصوصی ڈاکٹر فیصل سلطان نے خطاب کیا ہے۔

ڈاکٹر فیصل سلطان نے کہا ہے کہ کورونا نے پوری دنیا کے تمام ممالک کے صحت کے نظام کو متاثر کیا ہے اور اس بیماری کا مقابلہ کوئی ایک ملک تنہا نہیں کر سکتا ہے۔

ڈاکٹر فیصل کا کہنا تھا کہ کورونا کے خلاف پوری دنیا کو متحد ہونا ہوگا اور ویکسین بھی اس وباء سے بچاؤ کے ضروری ہے۔

انہوں نے کہا ہے کہ پاکستان میں موجودہ لہر بہتری کی طرف جا رہی ہے لیکن جب تک تمام شہریوں کو ویکسین نہیں لگتی پابندیاں ختم نہیں ہو سکتی ہیں۔

ڈاکٹر فیصل سلطان نے مزید کہا ہے کہ دنیا بھر میں سال کے آخر تک اتنے لوگ ویکسین لگوا لیں گے کہ پھیلاؤ کم ہو جائے گا۔

اس سے قبل تقریب کے دوران یوایس ایڈ کی جانب سے پاکستان کو کورونا سے بچاؤ کے آلات فراہم کیے گئے ہیں جس پر ڈاکٹر فیصل کی جانب سے یو ایس ایڈز کا شکریہ ادا کیا گیا ہے۔

اس حوالے سے ڈاکٹر فیصل سلطان نے بتایا ہے کہ یوایس ایڈ کی یہ کوشش ہمارے مابین طویل دوستانہ تعلقات کی عکاس ہے۔

انہوں نے بتایا ہے کہ آکسیجن، مانیٹرنگ آلات اس کھیپ میں شامل ہیں۔