امیر جماعت اسلامی کراچی حافظ نعیم الرحمن نے کہا کہ ڈالر کی قیمت میں اضافے کے ساتھ کھالوں کی قیمتوں میں بھی اضافہ ہونا چاہیے۔

تفصیلات کے مطابق حافظ نعیم الرحمن نے کراچی میں پریس کانفرنس کی جس میں انہوں نے اجتماعی قربانی میں شرکت اور کھالوں کو عطیہ کرنے والوں کا شکریہ ادا کیا۔

حافظ نعیم الرحمن نے میڈیا کو بتایا کہ کراچی میں 200 سے زائد مقامات پر جماعت اسلامی اور الخدمت کے تحت اجتماعی قربانی کی گئی ہے اور الخدمت واحد ادارہ ہے جس کے پاس سالانہ حسابات کا آڈٹ موجود ہے۔

انہوں نے کہا کہ جانوروں کی کھال کی قیمت مسلسل کم کی جارہی ہے۔ حکومت جس طرح گننے کی قیمت متعین کرتی ہے اسی طرح کھالوں کی قیمت بھی متعین کرے اور ڈالر کی قیمت میں اضافے کے ساتھ کھالوں کی قیمت میں بھی اضافہ ہونا چاہیے۔

ان کا کہنا تھا کہ عوام کے تعاون سے ہی کراچی میں الخدمت کے تحت چلائے جانے والے پروجیکٹس صحت، تعلیم، روزگار، اور صاف پانی سمیت زندگی کے مختلف شعبہ جات کی سرگرمیاں جاری ہیں۔

حافظ نعیم الرحمن نے کہا کہ عید کے پہلے روز ہی شہر بھر میں صفائی ستھرائی کے انتظامات انتہائی ناقص نظر آئے اور شہر میں جگہ جگہ آلائشیں پڑی رہیں۔
امیر جماعت اسلامی کراچی حافظ نعیم الرحمن کا مزید کہنا تھا کہ حکومتی دعوے دھرے کے دھرے رہ گئے۔ حکومت کو چاہیے کہ شہر میں عید الاضحی کے موقع پر صفائی ستھرائی کا ترجیحی بنیادوں پرانتظام کروائے۔