صوبائی وزير اطلاعات سندھ سید ناصر حسين شاہ نے کہا ہے کہ ڈیلٹا جیسے مہلک وائرس سے محفوظ رہنے کے لیے ویکسینیشن ہی سب سے بہترین تدبیر ہے۔

تفصیلات کے مطابق صوبائی وزير اطلاعات سندھ سید ناصر حسين شاہ نے کلفٹن ڈرائیو تھرو ویکسینیشن سینٹر کا دورہ کیا،جہاں انہوں نے سہولیات کا جائزہ لیا اور ویکسین کے لئے شہریوں سے معلومات بھی لی۔

ان کا کہنا تھا کہ 18 جولائی سے ڈرائیو تھرو سینٹر شہریوں کو ویکسینیشن کی سہولت فراہم کر رہا ہے۔

سید ناصر حسين شاہ کا کہنا تھا کہ جے ایس بینک کے تعاون سے سندھ حکومت نے یہ ویکسینیشن سینٹر قائم کیا ہے اور ہم جے ایس بینک کی خدمات کو سراہتے ہیں۔

ناصر حسين نے مزید کہا کہ ہم جے ایس بینک اور دیگر اداروں کے تعاون سے شہر میں مزید ڈرائیو تھرو ویکسین کی سہولت  قائم کر رہے ہیں۔

ان کا کہنا تھا کہ بڑی تعداد میں شہری سینٹر پر ویکسینیشن کے لیے آ رہے ہیں اور رش کو دیکھتے ہوئے مزید کاؤنٹرز میں اضافہ کر دیا گیا ہے تاکہ زیادہ سے زیادہ شہریوں کو کم وقت میں ویکسین کی سہولت فراہم کی جا سکے۔

انھوں نے بتایا کہ کراچی شہر میں 6 ویکسینیشن سینٹرز کو ماس ویکسینیشن سینٹر کا درجہ دے دیا ہے اور یہ 24 گھنٹے کھلے رہیں گے۔

ناصر حسين کا کہنا تھا کہ ڈیلٹا جیسے مہلک وائرس سے محفوظ رہنے کے لیے ویکسینیشن  ہی سب سے بہترین تدبیر ہے۔

صوبائی وزير اطلاعات سندھ سید ناصر حسين شاہ کا مزید کہنا تھا کہ شہری کرونا ایس او پیز پر عمل کریں، خود بھی محفوظ رہیں اور شہر کو بھی محفوظ بنائیں۔