صدر آزاد جموں وکشمیر بیرسٹر سلطان محمود چوہدری نے کہا ہے کہ جنوبی ایشیاء میں مستقل امن کے لیے مسئلہ کشمیر کا حل بے حد ضروری ہے۔
تفصیلات کے مطابق صدر آزاد جموں وکشمیر بیرسٹر سلطان محمود چوہدری نے واشنگٹن میں پاکستان کے امریکہ میں سفیر اسد مجید کی رہائش گاہ پر امریکی تھنک ٹینکس نمائندوں اور دیگر کو مسئلہ کشمیر پر بریفنگ دیتے ہوئے کہا کہ پاکستان نے مسئلہ کشمیر کے حل کے لیے عالمی سطح پر ہر فورم پر آگے بڑھ چڑھ کر اپنا کردار ادا کیا ہے، بلکہ جب امریکی صدر ٹرمپ نے مسئلہ کشمیر پر ثالثی کی پیشکش کی تھی تو وزیر اعظم عمران خان نے اُن سے کہا تھا کہ پہلے مقبوضہ کشمیر میں جاری مظالم بند کرائے جائیں تاکہ امن عمل میں پیشرفت ہو سکے۔
بیرسٹر سلطان محمود چوہدری نے کہا کہ نائن الیون کے بعد کشمیریوں نے انٹرنیشنل کمیونٹی کے کہنے پر ہتھیار نیچے رکھ دیے اور عالمی برادری کو موقع دیا کہ وہ مسئلہ کشمیر کو پر امن اور بات چیت کے ذریعے حل کرنے کے لیے اپنا کردار ادا کرے لیکن افسوس کی بات ہے کہ اس سلسلے میں عالمی برادری کی طرف سے کوئی خاطر خواہ اقدامات نہیں اٹھائے گئے۔ لہذا اب کسی سانحہ یا حادثے کا انتظار کیے بغیر مسئلہ کشمیر کے حل کے لیے انٹرنیشنل کمیونٹی کے ساتھ ساتھ امریکہ اور دیگر ممالک کے تھنک ٹینکس بھی اپنا کردار ادا کریں۔
ان کا کہنا تھا کہ ایک ایسا سازگار ماحول بنایا جائے تاکہ مسئلہ کشمیر کے حل کے لیے راہ ہموار ہو سکے۔
ذرائع نے کہا کہ اس موقع پر بریفنگ میں سابق امریکی صدر اوبامہ کی مشیر برائے ایشیاء رابن رافیل، سابق امریکی نائب وزیر خارجہ ٹریسٹا شیفر، مدیحہ افضل، امریکہ میں تعینات پاکستانی سفیر اسد مجید اور تھنک ٹینکس کے دیگر نمائندے بھی شریک تھے۔