نیپرا نے کہا ہے کہ قابل اعتماد اور محفوظ بجلی کی فراہمی پر کوئی سمجھوتہ نہیں کیا جائے گا۔

تفصیلات کے مطابق نیشنل الیکٹرک پاور ریگولیٹری اتھارٹی نے کے الیکٹرک کا دورہ کیا جس پر کے الیکٹرک کے حکام نے اتھارٹی کو ٹرانسمیشن اور ڈسٹری بیوشن کے نقصانات پر قابو پانے کے اقدامات اور صارفین کو بلا تعطل  بجلی کی فراہمی کو یقینی بنانے کے بارے میں بریفنگ دی۔

نیپرا کے مطابق کے الیکٹرک نے گرڈ انسولیشن سسٹم اور پیپر لیس بلنگ کے بارے میں اتھارٹی کو بریفنگ دی۔

ذرائع کا کہنا ہے کہ اتھارٹی نے کے الیکٹرک کی جانب سے کیے گئے اقدامات کو سراہا ہے۔

ذرائع کا کہنا تھا کہ اتھارٹی نے بی پی کیو ایس 3 پروجیکٹ کی تکمیل میں تاخیر پر تشویش  کا اظہار کیا جس پر کے الیکٹرک نے نیپرا کو 30 نومبر 2021 تک منصوبہ مکمل کرنے کی یقین دہانی دلائی۔

ذرائع کا کہنا ہے کہ اتھارٹی نے کے الیکٹرک کو ہدایت دی کہ وہ ملازمت والی جگہوں پر موثر نگرانی کو یقینی بنائے تاکہ صارفین اور ملازمین محفوظ رہیں۔

ذرائع کا کہنا تھا کہ اتھارٹی نے اقوام متحدہ کے گلوبل کمپیکٹ کے دستخط کی تقریب میں شرکت کی اور کے الیکٹرک  کی کوویڈ 19 کی موبائل ویکسینیشن مہم کا افتتاح بھی کیا۔

ذرائع نے کہا کہ اتھارٹی نے کے الیکٹرک کی جانب سے شروع کیے گئے روشنی باجی پروگرام کے تحت “فرسٹ ویمن الیکٹریشنز” کی گریجویشن تقریب میں بھی شرکت کی۔

چئیرمین نیپرا کا اس موقعے پر کہنا تھا کہ نیپرا اپنی “بجلی کے ساتھ خوشحالی” مہم کے مطابق ملک کے پاور سیکٹر میں ایک جامع ترقیاتی ماڈل کو یقینی بنائے گا۔