پاک چین مشترکہ انسداد دہشت گردی فوجی مشقیں اختتام پذیر ہوگئی ہیں۔

پاک فوج کے شعبہ تعلقات عامہ (آئی ایس پی آر) کے مطابق شنگھائی تعاون تنظیم کے پلیٹ فارم کے تحت انسداد دہشت گردی کی مشترکہ فوجی مشقیں نیشنل کاؤنٹر ٹیرارزم سینٹر پبی میں اختتام پزیر ہوگئیں، مشقوں کا مقصد انسداد دہشت گردی کی عالمی سطح پر کوششوں کے لئے تعاون بڑھانا تھا۔

آئی ایس پی آر کے مطابق ایس سی او کے پلئٹ فارم پر انسداد دہشت گردی کے حوالے سے یہ پہلی فوجی مشقیں تھیں، جو دو ہفتے تک نیشنل کائونٹر َٹیررازم سینٹرمیں جاری رہیں۔

آئی ایس پی آر  کا کہنا ہے کہ مشقوں میں پاکستانی اور چینی دستوں نے اپنے تجربات کا تبادلہ کیا، مشقوں میں ابھرتی ہوئی ٹیکنالوجی، نئے رجحانات اور تکنیکس کا بھی مظاہرہ ہوا۔

آئی ایس پی آر کا یہ بھی کہنا ہے کہ  مشقوں کے پہلے مرحلے میں 26 سے 31 جولائی تک ایس سی او کے رکن ممالک نے اپنے علاقوں میں تربیتی مشقیں کیں جس کے بعد دوسرے مرحلے میں 21 ستمبر سے 4 اکتوبر تک پاکستان میں مشقوں کا انعقاد کیا گیا۔

ترجمان پاک فوج نے کہا کہ  مشقوں میں مشترکہ انسداد دہشت گردی آپریشنز، ہیلی کاپٹر کے ذریعے آپریشنز، سرچ اینڈ کلیئرنس آپریشن، کلوز کوارٹر بیٹل، دھماکہ خیز مواد کی ہینڈلنگ اور میڈیکل انخلاء شامل تھا۔

آئی ایس پی آر کا  مزیدکہنا ہے کہ  کمانڈر سینٹرل کمانڈ لیفٹیننٹ جنرل شاہین مظہر محمود اختتامی تقریب میں مہمان خصوصی تھے۔