لاہور میں مینار پاکستان کے گریٹر اقبال پارک میں دست درازی، ہراسگی اور بدتمیزی کا نشانہ بننے والی خاتون ٹک ٹاکر عائشہ اکرام کے بیان کے بعد مرکزی ملزم کو گرفتار کرلیا گیا ہے۔

تفصیلات کے مطابق یوم آزادی کے موقع پر خاتون ٹک ٹاکر عائشہ اکرام سے  دست درازی کے معاملے پر خاتون نے پولیس کو ایک اہم بیان دیا ہے جس میں انہوں نے اپنے ساتھی کو ملزم بتایا ہے۔

عائشہ اکرام کے بیان کے بعد پولیس نے فوری طور پر کارروائی کرتے ہوئے ان کے ساتھی ریمبو کے علاوہ دیگر چھ افراد کو بھی حراست میں لے لیا ہے۔

اس حوالے سے پولیس حکام کا کہنا ہے کہ عائشہ اکرم نے ریمبو سمیت دیگر 12 افراد کے خلاف اپنا تحریری بیان دیا تھا ۔

انہوں نے بتایا کہ عائشہ نے 400 افراد کے خلاف مقدمہ درج کرایا تھا جن میں سے 104 افراد کو گرفتار کیا گیا۔ شناخت پریڈ کے دوران متاثرہ خاتون نے چھ افراد کو شناخت کیا جن میں ارسلان، عابد، شہریار، مہران اور ساجد شامل ہیں۔ واقعے میں ملوث دیگر افراد کو ضمانت پر رہائی مل چکی ہے۔

خیال رہے کہ ٹک ٹاکر عائشہ اکرام نے اپنے ساتھی ریمبو کے حوالے سے انکشافات کرتے ہوئے بتایا تھا کہ  13 افراد کا گینگ عائشہ کی ایک نیم برہنہ فوٹیج پر اسے 2 سال سے بلیک میل کر رہا تھا جبکہ 14 اگست کو اسے زبردستی بلیک میل کر کے مینار پاکستان لیجایا گیا تھا۔