واسا (واٹر اینڈ سینیٹیشن ایجنسی) نے ائیر کوالٹی انڈکس کی خراب ہوتی صورت حال کے پیش نظر واسا لاہور میں ہر ہفتے والا دن کار فری دن قرار دے دیا۔

ایم ڈی واسا سید زاہد عزیز نے اس اقدام پر بریفنگ دیتے ہوئے کہا کہ شہری علاقوں میں دھواں چھوڑتی گاڑیوں کا سموگ پھیلاؤ میں بڑا حصہ ہے، ہم سموگ کے خاتمہ کے لیے اپنی روایات کو برقرار رکھتے ہوئے ہفتہ میں ایک دن سائیکلوں پر آ رہے ہیں۔

ایم ڈی واسا نے کہا کہ واسا لاہور کے افسران ہفتے والے دن سائیکل یا پبلک ٹرانسپورٹ پر آفس آئیں گے اور گاڑیاں لانے پر پابندی ہو گی۔ سائیکلنگ اور دیگر اقدامات کا مقصد گاڑیوں کے بے جا استعمال میں کمی لانا ہے۔

سید زاہد عزیز نے کہا کہ واسا لاہور نے سموگ کے خاتمے کے لیے 15 اکتوبر سے ہی اقدامات شروع کر دیے تھے اور ہیوی مشینری کے استعمال کو محدود کر دیا تھا۔ اس کے علاوہ واسا لاہور اپنے دسمبر کے بلوں میں اپنے 7 لاکھ صارفین کو سموگ سے متعلق آگاہی دے گا۔

ان کا کہنا تھا کہ سموگ کے متعلق میڈیا کا کردار قابل ستائش ہے۔ اہلیان لاہور سے بھی اپیل ہے کہ آئیں مل کر اس مہم کا حصہ بنیں، کم سے کم ہفتہ میں ایک دن گاڑیوں کی جگہ پیدل یا سائیکل کا زیادہ استعمال کریں۔

اس موقعے پر ڈی ایم ڈی آپریشن محمد غفران، ڈی ایم ڈی انجیئرنگ محمد منان، ڈائریکٹر پی آر امتیاز غوری، ڈائریکٹر فنانس آصف فیاض، ڈائریکٹر پلاننگ ذیشان بلال اور ڈپٹی ڈائریکٹر پلاننگ طیب ملک سمیت دیگر افسران نے شرکت کی۔