گنے کی سندھ منتقلی کے معاملے پر ظاہر پیر میں انتظامیہ کی غنڈہ گردی دوبارہ شروع ہو گئی ہے۔

گنے کی پنجاب سے سندھ کی شوگر ملز کو منتقلی پر عدالتی احکامات کے باوجود انتظامیہ گنے کی لوڈنگ رکوانے سے بعض نہ آئی اور اے سی خان پور نے بھاری مشینری کے ہمراہ رات کی تاریکی میں آج دوبارہ ظاہر پیر میں آپریشن کرتے ہوئے زبردستی گنے کی لوڈنگ بند کرا دی جبکہ کسانوں کو بھی گرفتار کرنے کی دھمکیاں دیں۔

دھمکیاں ملنے پر کسانوں نے شدید احتجاج کرتے ہوئے دوسرے روز قومی شاہرہ بلاک کر دی اور انتظامیہ کے خلاف شدید نعرے بازی کی۔

کسانوں کا سراپا احتجاج کرتے ہوئے کہنا تھا کہ پولیس کی بھاری نفری بھی اے سی کے ہمراہ ہے اور ہمیں گرفتار کرنے کی دھمکیاں مل رہی ہیں۔

کسانوں کا کہنا ہے کہ انتظامیہ رحیم یار خان کی شوگر ملز کو گنا فروخت کرنے کے لیے مجبور کر رہی ہے۔ انتظامیہ نے کسانوں  کے بجائے مقامی شوگرملز کے مفادات کا تحفظ اپنا فرض بنا لیا ہے۔

احتجاجی کسانوں کا کہنا تھا کہ ہائی کورٹ کے واضع احکامات ہیں کہ کسان اپنا گنا پاکستان میں جہاں چاہے فروخت کر سکتے ہیں مگر اسسٹنٹ کمشنر خان پور انہیں ضلع رحیم یار خان کی شوگر ملز کو گنا فروخت کرنے کے لیے مجبور کر رہے ہیں۔

انہوں نے چیف جسٹس آف پاکستان اور وزیراعظم پاکستان عمران خان سے نوٹس لے کر کسانوں کو شوگر مافیا اور مقامی انتظامیہ کے ظلم سے بچانے کی اپیل کی ہے۔