۔پنجاب کے صوبائی وزیر ہائیر ایجوکیشن راجہ یاسر ہمایوں نے دُبئی ایکسپو کا دورہ کیا ہے

انہوں نے دُبئی ایکسپو میں پاکستانی پویلین کا دورہ کیا، وہ چیرمین پی آئی ٹی بی اظفر منظور اور ڈی جی ساجد لطیف کے ہمراہ پویلین پہنچے۔

صوبائی وزیر راجہ یاسر وزیراعلی پنجاب عثمان بزدار کی ہدایت پر ایکسپو میں پاکستانی پویلین کا جائزہ لینے پہنچے اور  آئی ٹی بی کی تقریب کے انتظامات کا جائزہ لیا۔

راجہ یاسر نے پاکستان کی نمائندگی کرنے والی سٹارٹ اپس کے نمائندگان سے ملاقات کی، اس موقع پر انہوں نے کہا کہ بین الاقوامی سطح پر پذیرائی سے ائی ٹی کے شعبہ میں ترقی کے نئے دور کا آغاز ہوا ہے۔

انہوں نے کہا کہ حکومت پنجاب آئی ٹی کے شعبہ میں ترقی کے لئے جامع حکمت عملی پر عمل پیرا ہے، بین الاقوامی کمپنیاں آئی ٹی کے شعبہ میں سرمایہ کاری کے لئے رابطے کر رہی ہیں اورخوشحال ڈیجیٹل پنجاب کی بنیاد رکھ دی ہے۔

اس سے قبل وزیر توانائی پنجاب ڈاکٹر محمد اختر ملک نے دبئی ایکسپو کا دورہ کیا تھا جس میں انہوں نے بتایا تھا کہ ین الااقوامی سرمایہ کاروں نے ہمارے سولر پنجاب اور سولر سٹی کے منصوبوں کو سراہا ہے۔

ان منصوبوں میں جرمنی ، کینیڈا ، ترکی اور چین کی سولر کمپنیوں کے سرمایہ کاروں نے محکمہ توانائی پنجاب کی انویسٹمنٹ پلان میں دلچسپی ظاہر کی تھی۔