لوکل گورنمنٹ ترمیمی بل 2021 آج سندھ اسمبلی میں پیش کیا جائے گا۔

سندھ اسمبلی میں بلدیاتی ایکٹ ترمیمی بل 2021 آج پیش کیا جائے گا، نئے بلدیاتی نظام کے ذریعے صوبے بھر میں سابق صدر جنرل ریٹائرڈ پرویز مشرف دور کا ٹاؤن سسٹم بحال کیا جائے گا۔ بول نیوز کو ترمیمی بل کی کاپی موصول ہوگئی ہے۔

مجوزہ نئے بل کے تحت بلدیاتی اداروں کومزید با اختیار بنایا جائے گا ، میٹروپولیٹن سسٹم میں اضلاع ختم کرکے ٹاؤن نظام متعارف کرایا جائے گا ، ضلع کونسل ختم کرکے ٹاؤن میونسپل کارپوریشن قائم کی جائیں گیں جب کہ مجوزہ قانون کے مطابق کچرا اٹھانے اور واٹر اینڈ سیوریج کا نظام میئر کے ماتحت ہوگا۔

نئے بلدیاتی نظام میں میئر اور ڈپٹی میئر کا انتخاب شو آف ہینڈ کے بجائے انتخاب کے ذریعے کیا جائے گا جب کہ میئر وڈپٹی میئر کے لیے کسی بھی فرد کا انتخاب کیا جاسکے گا۔

صوبائی حکومت نے بلدیاتی ایکٹ ترمیمی بل 2021 کو اسمبلی سے پاس کروانے کے لیے اپنے تمام اراکین سندھ اسمبلی کو اجلاس میں شرکت یقینی بنانے کی ہدایت کی ہے۔

اس سے قبل سندھ حکومت بلدیاتی الیکشن کروانے کے لیے وقتاً فوقتاً مہلت طلب کرتی رہی ہے تاہم الیکشن کمیشن آف پاکستان نے حکومت سندھ کو 30 نومبر تک تمام کام مکمل کرکے ضروری دستاویزات کمیشن کے حوالے کرنے کا کہا تھا۔

دوسری جانب سندھ ہائی کورٹ نے صوبے میں بلدیاتی الیکشن کروانے سے متعلق کیس کی سماعت کے دوران ریمارکس دیتے ہوئے کہا تھا کہ صوبائی حکومت کے رویے سے لگتا ہے وہ بلدیاتی الیکشن کروانے میں سنجیدہ نہیں ہے۔

واضح رہے سندھ میں بلدیاتی اداروں کی مدت 30 اگست 2020 کو ختم ہوگئی تھی۔