اسپیکر پنجاب اسمبلی چودھری پرویز الٰہی نے کہا ہے کہ اتحاد بین المسلمین کے لیے علماء اور مشائخ کا کردار قابل تحسین ہے۔

پرویز الہی سے وزیراعظم کے معاون خصوصی برائے مذہبی امور علامہ طاہر اشرفی نے 11 رکنی علماء مشائخ و مفتیان کے وفد کے ہمراہ ملاقات کی جس میں اتحاد بین المسلمین اور بین المذاہب ہم آہنگی سمیت باہمی دلچسپی کے امور پر تبادلہ خیال ہوا۔

اسپیکر قومی اسمبلی نے ملاقات میں کہا کہ ہم مذہبی ہم آہنگی کے فروغ کے لیے علمائے کرام کے کردار کے معترف ہیں۔

پرویز الہی کا کہنا تھا کہ معاشرے میں تحمل اور برداشت کے تصور کو فروغ دینے کے لیے علماء کرام نے ہمیشہ رواداری اور یکجہتی کا سبق دیا ہے۔

ان کا کہنا تھا کہ پنجاب اسمبلی قرآن ایکٹ اور ختم نبوت کے حوالے سے متعلق قانون بھی متفقہ طور پر منظور کر چکی ہے جو کہ آئندہ آنے والی نسلوں کے لیے مشعل راہ ہو گی۔

علامہ طاہر اشرفی کا ملاقات کے دوران کہنا تھا کہ اسمبلی بلڈنگ میں ختم نبوت کے حوالے سے قرآنی آیات و احادیث کو مزین کرنا اور قرآنی تعلیم کو نصاب میں شامل کرنا بہت بڑا کارنامہ ہے۔

انہوں نے کہا کہ تمام سرکاری دفاتر، ضلعی داخلی اور خارجی راستوں پر ختم نبوت سے متعلق قرآنی آیت اور احادیث مبارکہ آویزاں کرنے سے متعلق قرارداد پنجاب اسمبلی سے متفقہ طور پر پاس کروانے پر اسپیکر چودھری پرویز الٰہی کو خراج تحسین پیش کرتے ہیں۔

وفد نے پنجاب اسمبلی کی نئی بلڈنگ اور ایوان کا دورہ بھی کیا۔

ملاقات میں چوھدری پرویز الہی کے ہمراہ صوبائی وزیر معدنیات حافظ عمار یاسر، راسخ الٰہی اور شبیر اسلم نے شرکت کی۔