عثمان بزدار نے کہا ہے کہ ایل ڈی اے کو پبلک فرینڈلی ادارہ بنایا ہے۔

 وزیراعلیٰ پنجاب سردار عثمان بزدارکی زیر صدارت لاہور ڈویلپمنٹ اتھارٹی کی گورننگ باڈی کا8واں اجلاس ہوا جس میں وزیراعلیٰ عثمان بزدار نے ماسٹر پلان کو حتمی شکل دینے کیلئے مزید مشاورت کی ہدایت دی۔

3 گھنٹے طویل اجلاس میں مختلف ایجنڈوں کی منظوری دی گئی، لاہور ڈویژن کے ماسٹر پلان 2050 پر تفصیلی غور کیا گیا جبکہ لاہور ڈویژن کے ماسٹر پلان کے حوالے سے مختلف سفارشات اور تجاویز کا جائزہ لیا گیا۔

اجلاس کے دوران  علامہ ا قبال ٹاؤن میں فروٹ او رویجیٹبل مارکیٹ کیلئے مختص پلاٹ نمبر1 او رپلاٹ نمبر88 کوکمرشل پلاٹس میں تبدیل کرنے کی منظوری دی گئی جبکہ موضع پنڈو کی تحصیل ماڈل ٹاؤن میں اراضی کو ایگری کلچر ل سے انڈسٹریل میں تبدیل کرنے کی بھی  منظوری دی گئی۔

ایل ڈی اے ایونیو ون او رجوبلی ٹاؤن کے نادہندگان کو ادائیگی کی آخری مہلت دینے کا فیصلہ کیا گیا جبکہ ایل ڈی اے میں لیگل ایڈوائزر کی بھرتی کے سیلکشن بورڈ میں ترمیم کا  بھی فیصلہ کیا گیا ۔

وزیراعلیٰ پنجاب سردار عثمان بزدارنےکہا کہ شہریوں کو زیادہ سے زیادہ سہولتیں فراہم کرنے کے لئے ایل ڈی اے میں انقلابی اصلاحات متعارف کرائی ہیں۔

 عثمان بزدارنے مزید کہا کہ ایل ڈی اے کو پبلک فرینڈلی ادارہ بنایا ہے، ایل ڈی اے میں اصلاحات کر کے شہریو ں کو زیادہ سے زیادہ سہولتیں فراہم کی گئی ہیں۔

اجلا س میں صوبائی وزیر ہاؤسنگ اسد کھوکھر،ایم پی اے سعدیہ سہیل،سیکرٹری ہاؤسنگ، پرنسپل سیکرٹری وزیراعلیٰ، کمشنر لاہور ڈویژن، ممبر ایل ڈی اے شیخ امتیاز محمود،ممبر ایل ڈی اے طارق ثناء باجوہ،سیکرٹری بلدیات، سیکرٹری پلاننگ اینڈ ڈویلپمنٹ او رمتعلقہ حکام نے  شرکت کی۔