چیئرمین پاک سر زمین پارٹی سید مصطفیٰ کمال نے کہا ہے کہ اب حکومت کے پاس پی ایس پی کی باکردار، تجربہ کار اور محنتی قیادت کے علاوہ کوئی دوسرا آپشن نہیں ہے۔

مصطفیٰ کمال نے پریس کانفرنس کرتے ہوئے کہا کہ ہم پاکستان کے بیشتر اور کراچی کے تمام مسائل چھ نکاتی حل کے زریعے ٹھیک کر دیں گے، آج نہیں تو کل ہمارے ہی پیش کردہ قابل عمل حل سے پاکستان کی موجودہ صورتحال ٹھیک ہو گی۔

ان کا کہنا تھا کہ حکمران جتنی دیر سے ہمارے پیش کردہ حل پر عمل درآمد کریں گے، اتنا ہی نقصان پاکستان کی معاشی انجن کو پہنچے گا۔

انہوں نے کہا کہ کراچی سے کشمیر تک عوامی مسائل حل کرنے کا واحد راستہ وسائل اور اختیارات کی نچلی سطح پر منتقلی ہے۔

چیئرمین پاک سر زمین پارٹی کا کہنا تھا کہ سب سے پہلے اٹھارویں ترمیم میں ملنے والے اختیارات وزراء اعلیٰ ہاؤس سے نکال کر نچلی ترین سطح تک منتقل کیے جائیں۔

انہوں نے کہا کہ دوسرا طریقہ یہ ہے کہ این ایف سی ایوارڈ کی طرز پر پی ایف سی ایوارڈ کے اجراء کو لازم اور پی ایف سی کو این ایف سی کے ساتھ مشروط کیا جائے۔

ان کا کہنا تھا کہ تیسرا طریقہ یہ کہ پاکستان کی معاشی شہہ رگ کراچی کی مردم شُماری ٹھیک کرائی جائے، اسی تناسب سے قومی اور صوبائی اسمبلیوں کی نشستیں بڑھائی جائیں، اس میں ہر پاکستانی کا فائدہ ہے۔

مصطفیٰ کمال نے کہا کہ چوتھی بات یہ کہ کراچی کو 7 ڈسٹرکٹس کے بجائے ایک ڈسٹرکٹ کی صورت میں بحال کیا جائے اور پانچویں اور بات یہ کہ کراچی ماسٹر پلان ڈیپارٹمنٹ کو تمام اختیارات واپس کر کے سندھ بلڈنگ کنٹرول اتھارٹی سے علیحدہ کر کے بحال کیا جائے۔

آخری بات یہ کہ کراچی میں کے پی ٹی کنٹونمنٹ سمیت تمام 18 ایجنسیوں کے بلدیاتی امور میئر کے دفتر کو دیے جائیں جبکہ زمین کا اختیار انہی ایجنسیز کے پاس رہے۔

انہوں نے مزید کہا کہ قوم نے تمام تجربات کر کے دیکھ لیے ہیں، اب ان کے پاس پی ایس پی کی باکردار، تجربہ کار اور محنتی قیادت کے علاوہ کوئی دوسرا آپشن نہیں ہے۔