فواد چوہدری اور آصف زرداری کی نااہلی کے لیے دائر کیس کی  سماعت  پر عدالت نے  اہم قانونی نکتے پر معاونت طلب کر لی۔

اسلام آباد ہائی کورٹ میں وفاقی وزیرفواد چوہدری اورسابق صدر آصف علی زرداری کی نااہلی کے لیے دائر کیس کی  سماعت  پر عدالت  نے حکم دیتے ہوئے کہا کہ منتخب نمائندوں کی نااہلی سے متعلق کیسز کیوں سنے؟ وکلا معاونت کریں

عدالت نے کہا کہ  آئندہ سماعت پر قابل سماعت ہونے پر دلائل دیں۔ کیس میں مزید التوا نہیں دیا جائے گاَ

 فواد چوہدری کے بھائی فیصل چوہدری بہ طور وکیل عدالت کے سامنے پیش ہوئے۔ نجی  ٹی وی کے اینکرسمیع ابراہیم نے فواد چوہدری کی نااہلی کے لیے عدالت سے رجوع کررکھا ہے۔

 وکیل فیصل چوہدری نے فواد چوہدری نااہلی کیس عدم پیروی پر خارج کرنے کی استدعا کی جس پر چیف جسٹس اطہر من اللہ نے ریمارکس دیتے ہوئے کہا کہ ابھی ان کو آئندہ سماعت پر آنے دیں پھر دیکھتے ہیں۔

عدالت نے  سماعت ہوتے ہی استفسارکیا کہ  آج کون دلائل شروع کرے گا ؟  جس پر وکیل فیصل چوہدری نے کہا کہ پٹشنر سمیع ابراہیم دلائل شروع کریں گے۔

چیف جسٹس نے کہا  عدالت کو منتخب نمائندوں کے ایسے معاملات میں کیوں پڑنا چاہے؟ عدالتوں میں آنے کی بجائے سیاسی لیڈرشپ کو میدان میں مقابلہ کرنا چاہیے۔ یہ پارلیمنٹ کا معاملہ ہے یہاں پہلے ہی کیسز کا بوجھ ہے ، دوسرے فورم بھی موجود ہیں پارلیمنٹ اپنا احتساب خود کرے ۔

ریمارکس میں  چیف جسٹس اطہر من اللہ نے مزید کہا کہ عدالت ان کیسز کے میرٹس پر نہیں جائے گی۔ پہلے قابل سماعت ہونے پر دلائل دیں۔ہم کوئی سپیرئیر تو نہیں یہ عوامی نمائندے ہیں ان کا خود احتسابی کا اپنا نظام ہونا چاہیے

اسلام آباد ہائی کورٹ نے  کیس کی مزید سماعت 9 دسمبر تک ملتوی کردی۔