اسپیکراسمبلی اسد قیصر کی زیرِ صدارت پارلیمانی کمیٹی برائے قومی سلامتی کا اہم اجلاس قومی اسمبلی ہال میں جاری، عسکری قیادت کی جانب سے افغانستان کی صورتحال پر بریفنگ۔

ذرائع کے مطابق عسکری حکام نے بریفنگ دیتے ہوئے کہا کہ عالمی برادری کے تسلیم کرنے پر ہی پاکستان افغان طالبان کی حکومت کو تسلیم کرے گا۔ داعش افغانستان کے لیے آج بھی بڑا خطرہ ہے، اس کے خاتمے کے لیے افغان حکومت سے تعاون جاری ہے۔

بریفنگ میں کہا گیا کہ پاکستان خطے میں ہونے والی تبدیلیوں پر گہری نظر رکھے ہوئے ہے۔ دشمن ممالک اس ساری صورتحال کا فائدہ اٹھانے کی کوشش میں ہیں۔ ہم باربارعالمی برادری پر زور دے رہے ہیں کہ وہ افغان حکومت کو تنہا نہ چھوڑے۔

قومی سلامتی کمیٹی کے اجلاس میں  آرمی چیف جنرل قمر جاوید باجوہ، ڈی جی آئی ایس آئی، ڈی جی آئی ایس پی آر، سیکرٹری خارجہ، سیکرٹری داخلہ، سیکریٹری نیشنل سیکیورٹی، اسپیکر قومی اسمبلی، چیرمین سینٹ سمیت  قومی اسمبلی و سینیٹ ممران  شریک ہیں۔

 چئیرمین پیپلز پارٹی بلاول بھٹو زرداری، اپوزیشن لیڈر شہباز شریف وفاقی کابینہ کے تمام اراکین، چاروں وزرائے اعلی، صدر، وزیراعظم آزاد کشمیر اور وزیراعلی گلگت بلتستان  بھی اجلاس میں شریک ہیں۔

اجلاس سے قبل پارلیمنٹ ہاؤس میں میڈیا کے داخلے پر پابندی عائد کردی گئی تھی۔ حکام کا کہنا تھا کہ میڈیا پر سیکیورٹی وجوہات کی وجہ سے پابندی عائد کی گئی ہے۔