اس نظام کے تحت ملک مزید کام نہیں کر سکتا، مصطفی کمال

اریبہ تنویر

08th Nov, 2021. 08:33 pm
شيئر
- Font size
  - Small
  - Medium
  - Large
- Dark Mode
- Save
- Print

آرٹیکلز

Now Reading:

اس نظام کے تحت ملک مزید کام نہیں کر سکتا، مصطفی کمال

پاک سر زمین پارٹی کے چیئرمین سید مصطفی کمال نے کہا ہے کہ اس نظام کے تحت ملک مزید کام نہیں کر سکتا۔

مصطفی کمال نے میڈیا سے گفتگو کرتے ہوئے کہا کہ سندھ کو تباہ و برباد کرنے والی کرپٹ اور تعصب زدہ پیپلز پارٹی ہے۔

ان کا کہنا تھا کہ پیپلز پارٹی آج عمران خان کی ناقص کارکردگی کے پیچھے اپنی بدترین کرپشن اور نا اہلی چھپانے کے لیے مظاہرے کر رہی ہے۔

انہوں نے کہا کہ عمران خان کا قصور یہ ہے کہ کراچی سے جیتنے کے باوجود انہوں نے اپنے اقتدار کو برقرار رکھنے کی خاطر پاکستان کے معاشی انجن کراچی کو پیپلز پارٹی کے ظلم اور تعصب سے نہیں بچایا، ظالم اور نا اہل حکمران اختیارات اور ملکی وسائل کو ذاتی جاگیر سمجھ کر اس پر قابض رہے۔

مصطفی کمال کا کہنا تھا کہ پی ایس پی آئین میں 2 اہم ترامیم کروائے گی جس سے پاکستانی عوام کے 90 فیصد مسائل حل ہو جائیں گے۔ پہلا مقامی حکومتوں کے محکمے اور اختیارات آئین میں لکھے جائیں اور دوسرا نیشنل فنانس کمیشن کی طرز پر پی ایف سی ایوارڈ کو آئین کا حصہ بنائیں۔

ان کا مزید کہنا تھا کہ عوام نے موقع دیا تو ہم سب ٹھیک کر دیں گے کیونکہ ہمیں کام کرنے اور کرانے کا تجربہ ہے۔