امریکی کانگریس کے وفد نے وزیراعظم عمران خان سے ملاقات کی ہے۔

وزیراعظم ہاوس کی جانب سے جاری اعلامیے کے مطابق وزیر اعظم نے دونوں اراکین کانگریس کے دورہ پاکستان کا خیرمقدم کیا۔

 ملاقات میں ہاؤس فارن افیئرز کمیٹی کے چیئرمین کانگریس مین گریگوری میکس، ذیلی کمیٹی برائے ایشیا، بحرالکاہل، وسطی ایشیا اور عدم پھیلاؤ کے چیئرمین کانگریس مین امی بیرا بھی موجود تھے۔

اس موقع پر وزیراعظم عمران خان کا کہنا تھا کہ دورہ پاکستان اور امریکہ کے تعلقات کو مزید گہرا کرنے کا باعث بنے گا اور دونوں ممالک کی پارلیمانوں کے درمیان تعلقات کو مضبوط بنانے میں بھی اہم کردار ادا کرے گا۔

جاری اعلامیے کے مطابق وزیراعظم عمران خان نے کہا کہ دونوں ممالک کے درمیان انتظامیہ سمیت تمام سطحوں پر مزید اعلیٰ سطحی تبادلے ہوں گے، جو ان کے تعلقات کو مزید مضبوط بنائیں گے۔

وزیراعظم نے کہا کہ پاکستان اور امریکہ کو افغانستان میں امن، استحکام اور اقتصادی ترقی کو فروغ دینے کے لیے روابط کو مزید گہرا کرنے کی ضرورت ہے۔

ان کا مزید کہنا تھا کہ انسانی بحران اور معاشی تباہی کو روکنے کی کوششوں کے ایک حصے کے طور پر افغان عوام کی مالی مدد کرنے کی فوری ضرورت ہے۔

امریکی کانگریس کے وفد اور وزیراعظم نے اتفاق کیا کہ پاکستان اور امریکہ کو دوطرفہ تجارتی اور اقتصادی تعلقات کو مضبوط بنانے کے ساتھ ساتھ صحت، سلامتی، انسداد دہشت گردی اور موسمیاتی تبدیلیوں سے نمٹنے میں تعاون کرنا چاہیے۔