سپریم کورٹ کا لارجر بنچ چیف جسٹس آف پاکستان کی سربراہی میں آج اہم مقدمات کی سماعت کرے گا۔

تفصیلات کے مطابق سپریم کورٹ رجسٹری کراچی میں آج دوسرے روز بھی اہم مقدمات کی سماعت ہوگی۔ چیف جسٹس آف پاکستان گلزار احمد کی سربراہی میں لارجر بنچ میں جسٹس اعجاز الاحسن، جسٹس قاضی، محمد امین احمد شامل ہیں۔

پی ای سی ایچ ایس سوسائٹی، گرین بیلٹ پر قبضے سے متعلق کیس، اسکیم 33 میں زمینیوں پر قبضے سے متعلق کیسز کی سماعت ہوگی۔ ہندو جم خانہ کیس بھی سماعت کے لیے مقررہے جبکہ سول اسپتال مٹھی میں نومولود بچوں کی ہلاکت کے کیس کی بھی سپریم کورٹ میں سماعت ہوگی۔

گذشتہ روز سپریم کورٹ رجسٹری میں ملٹری لینڈ کیس سے متعلق سماعت ہوئی۔ چیف جسٹس آف پاکستان نے اٹارنی جنرل، ایڈوکیٹ جنرل اورتمام کنٹونمنٹس کے سربراہوں کو نوٹس جاری کیے تھے۔ سپریم کورٹ نے سیکریٹری دفاع کو بھی رپورٹ کے ساتھ پیش ہونے کا حکم دیاتھا۔

ملٹری لینڈ کیس میں ڈائریکٹرملٹری لینڈ عدالت میں پیش ہوئے۔ سپریم کورٹ نے ڈائریکٹر کو ہدایت کی تھی کہ آج رپورٹ کے ساتھ پیش ہوں۔

گذشتہ روز رفاہی پلاٹوں پرقبضے سے متعلق کیس کی بھی سماعت ہوئی جس میں سپریم کورٹ نے کراچی میں پی ای سی ایچ ایس میں چارقدرتی جھیلیں بحال کرنے کا حکم دیا تھا۔ سپریم کورٹ نے کے ایم سی اسپورٹس کمپلیکس کشمیرروڈ سے ملبہ اٹھانےکا بھی حکم دیا۔

سپریم کورٹ رجسٹری کراچی میں گذشتہ روز گٹرباغیچہ بحالی کیس کی بھی سماعت ہوئی۔ سپریم کورٹ نے سوسائٹی کی الاٹمنٹ منسوخ کرنے کا حکم دیتے ہوئے کے ایم سی کو زمین کا قبضہ واپس لینے کا حکم دیا تھا۔ سپریم کورٹ نے باتھ آئی لینڈ گلشن فیصل میں کے ایم سی سوسائٹی کی بھی رپورٹ بھی طلب کی تھی۔