سرگودھا میں پولیس نے ڈکیت گینگ کے خلاف بڑی کارروائی کر کے ملزمان کو گرفتار کر لیا ہے۔

پولیس نے گھروں میں ڈکیتی، راہزانی، قتل کی وارداتوں میں ملوث بین الاضلاعی گینگ کے 4 ارکان گرفتار کر لیے ہیں جن کا تعلق کھاریاں، گجرات، ایبٹ آباد اور لاہور سے ہے۔

ملزمان کے قبضہ سے 22 لاکھ روپے نقدی، لیپ ٹاپ، موٹرسائیکل و دیگر مال مسروقہ برآمد ہوا ہے۔

پولیس کا کہنا ہے کہ شجاعت علی، محمد یاسر، محمد فراز اور میاں یاسر نے سرگودھا میں 8 ڈکیتی کی وارداتیں کیں اور ملزمان نے راولپنڈی میں بھی ڈکیتی اور راہزنی کی متعدد وارداتوں میں ملوث رہے ہیں۔

پولیس کا کہنا ہے کہ ملزمان وٹس ایپ کے ذریعے آپس میں رابطہ کرتے تھے اور جدید ٹیکنالوجی کی مدد سے ہم نے انہیں گرفتار کیا۔

پولیس نے کہا کہ گھر میں داخل ہونے کے لیے ملزمان خود کو ایجنسی یا ایف بی آر کا اہلکار ظاہر کرتے تھے۔

ڈی ایس پی سٹی ملک عثمان کا کہنا تھا کہ دوران ڈکیتی ملزمان نے ایک شخص کو فائرنگ کر کے قتل بھی کیا ہے۔

ملزمان کے خلاف تھانہ ساجد شہید، تھانہ کینٹ اور سیٹلائٹ ٹاؤن میں مقدمات درج ہیں۔

ڈی ایس پی سٹی کا مزید کہنا تھا کہ گروہ کے دیگر ساتھیوں کی گرفتاری کے لیے پولیس ٹیمیں تشکیل دے دی گئی ہیں۔