پیپلز پارٹی کے کارکنان مسلم لیگ ن سندھ کے صدر شاہ محمد شاہ کی رہائش گاہ پر پہنچ گئے۔

وزیر اطلاعات و محنت سندھ و صدر پیپلز پارٹی کراچی ڈویژن سعید غنی، وزیر اعلی سندھ کے معاون خصوصی و جنرل سیکرٹری پیپلز پارٹی سندھ وقار مہدی، سلمان مراد، خالد لطیف صابن والا و دیگر کارکنان نے مسلم لیگ ن سندھ کے صدر شاہ محمد شاہ کی رہائش گاہ پر ان سے ملاقات کی جس میں دو طرفہ سیاسی صورتحال سمیت دیگر امور کا جائزہ لیا گیا۔

شاہ محمد شاہ کا اس موقعے پر کہنا تھا کہ میں پیپلز پارٹی کے دوستوں کا مشکور ہوں کہ وہ یہاں تشریف لائے۔

ان کا یہ بھی کہنا تھا کہ ہمارے پیپلز پارٹی کے دوستوں سے ہمیشہ قریبی روابط رہے ہیں۔

ملاقات میں بلدیاتی ایکٹ 2021 سمیت دیگر امور کا بھی جائزہ لیا گیا۔

سعید غنی نے کہا کہ ہم شاہ محمد شاہ اور تمام رفقاء کے مشکور ہیں جنہوں نے ہماری استدعا پر دعوت دی۔

ان کا مزید کہنا تھا کہ اس وقت لوکل گورنمنٹ ایکٹ 2021 کے حوالے سے اپوزیشن کی سیاسی جماعتوں کی جانب سے عوام کو گمراہ کیا جا رہا ہے۔

اس موقع پر سابق گورنر سندھ محمد زبیر، سید منور رضا، ایم این اے خیل داس کوہستانی، چوہدری محمد طارق، ہریش سکیھجا، خواجہ شعیب، فیروز خان، حاجی صالحین، اسلم خٹک، راجہ انصاری، خالد شیخ اور دیگر بھی موجود ہیں۔