آئی جی پنجاب راؤ سردار علی خان نے لاہور کے تھانہ شاہدرہ کا اچانک دورہ کر لیا۔

آئی جی پنجاب نے تھانہ شاہدرہ کا اچانک دورہ کر کے حوالات کا جائزہ لیا اور زیر حراست ملزمان سے ان کے کیسز کے بارے میں بات چیت کی۔

آئی جی پنجاب نے دورے کے دوران تھانے کے تمام سیکشنز کا تفصیلی دورہ کیا، فرنٹ ڈیسک پر ریکارڈ کو چیک کیا اور فرنٹ ڈیسک میں کمپیوٹرائزڈ ڈیٹا کا اندارج اپڈیٹ نہ ہونے پر ڈی ایس پی اور ایس ایچ او پر برہمی کا اظہار بھی کیا۔

آئی جی پنجاب نے تھانے میں موجود تمام نفری کو لائن حاضر کر کے زیر تفتیش مقدمات کے بارے میں پوچھ گچھ کی۔

آئی جی پنجاب کا اس موقعے پر کہنا تھا کہ پولیس کا کام شہریوں کے جان و مال کی حفاظت کرنا اور ان کو فوری مدد فراہم کرنا ہے، اس عہدے میں کرپشن کسی صورت برداشت نہیں کی جائے گی، فرائض میں غفلت برتنے والوں کے خلاف سخت کارروائی ہو گی۔

آئی جی پنجاب نے تھانے نے مختلف سیکشنز، حوالات، پارکنگ ایریا میں صفائی کے ناقص انتظامات پر ڈی ایس پی اور ایس ایچ او کو مخاطب کر کے بولا کہ پہلی اور آخری دفعہ وارننگ دے رہا ہوں، آئندہ کسی کو معافی نہیں ملے گی۔

ان کا کہنا تھا کہ میں پنجاب کے تمام اضلاع کا دورہ کروں گا، فیلڈ افسران دفاتر میں بیٹھنے کی بجائے تھانوں کا دورہ کریں۔

انہوں نے دورے کے دوران تھانے کے حدود میں واقع گرجا گروں کی سکیورٹی اور ہوٹل آئی پر ہوٹلوں کے اندراج کا ریکارڈ چیک کیا۔

اس کے ساتھ آئی جی پنجاب نے اشتہاری ملزمان کی گرفتاری، منشیات کے استعمال اور خرید و فروخت میں ملوث منظم گروہ کے بارے میں سخت کارروائی کرنے کے احکامات دیے۔

آئی جی پنجاب نے کہا کہ سارے پولیس افسران تھانے میں آنے والے شہریوں سے خوش اخلاقی سے پیش آئیں، ایف آئی آر کے اندراج میں تاخیر کسی صورت برداشت نہیں کی جائے گی۔

آئی جی پنجاب نے تھانے میں آئی خاتون، بزرگ شہری اور دیگر سائلین کے مسائل سن کر ازالے کے لیے موقع پر احکامات بھی جاری کیے۔