وزیر اعظم آزاد کشمیر نے کہا کہ خطے کا امن افغانستان کی خوشحالی سے جڑا ہوا ہے۔

اپنے ایک بیان میں وزیراعظم آزاد جموں و کشمیر سردار عبد القیوم نیازی نے کہا کہ پاکستان کی میزبانی میں او آئی سی اجلاس خوش آئند ہے۔

انہوں نے کہا کہ پاکستان ایک ذمہ دار ریاست ہے ، خطے کا امن اور خوشحالی پاکستان کا مشن ہے۔

عبد القیوم نیازی کا کہنا تھا کہ خطے کا امن افغانستان کی خوشحالی سے جڑا ہوا ہے، وزیر اعظم پاکستان عمران خان اسلامی دنیا میں بڑے رہنما کی حیثیت سے سامنے آئے ہیں ۔

وزیراعظم آزاد جموں و کشمیر سردار عبد القیوم نیازی کا مزید کہنا تھا کہ او آئی سی مسلم ممالک کا نمائندہ فورم ہے، افغان قوم کی طرح کشمیریوں کی بھی او آئی سی توقعات ہیں۔

یاد رہ اس سے قبل پاکستان کے دارالحکومت اسلام آباد میں ہونے والے اسلامی تعاون تنظیم (او آئی سی) کے وزرائے خارجہ اجلاس میں افغانستان کی فوری امداد کے لیے انتہائی اہم سفارتی پیش رفت سامنے آئی ہے۔

اسلامی تعاون تنظیم نے افغانستان کی امداد کے لیے او آئی سی ٹرسٹ برائے مالیاتی تعاون کی منظوری دے دی۔

ذرائع کے مطابق ٹرسٹ فنڈ کی تجویز پاکستان نے وزرائے خارجہ کی دوسری اجلاس میں پیش کی، جس کو منظور کر لیا گیا۔

ذرائع کا کہنا ہے کہ مذکورہ ٹرسٹ میں او آئی سی رکن ممالک مالیاتی حصہ ڈالیں گے۔ او آئی سی ٹرسٹ فنڈ کو قرارداد کی شکل میں منظور کیا گیا ہے۔

خیال رہے کہ اسلامی تعاون تنظیم وزرائے خارجہ کونسل کے غیر معمولی اجلاس میں افغانستان کی نشست خالی رکھی گئی تھی۔