صوبائی وزیر جیل خانہ جات فیاض الحسن چوہان نے کہا ہے کہ راولپنڈی بلدیہ نے محنت کے ساتھ بہترین کام کیا ہے۔

انہوں نے اپنے بیان میں کہا کہ سندھ سے تعلق رکھنے والی ایک لیڈی پاکستان کی پہلی وزیر اعظم وہ پنڈی میں شہید ہوئیں، بے نظیر کی جائے شہادت کی دیکھ بھال کرنا یہ ہمارا اور آپ سب کا فرض ہے۔

صوبائی وزیر کا کہنا ہے کہ میں نے پاکستانی،  انسانیت اور اخلاقی فریضہ سمجھ کر یہ ڈیوٹی دی ہے، پی ٹی آئی تنگ نظر جماعت نہیں ہے ہم کھلے دل کے لوگ ہیں، ہمارے وزیر اعظم عمران خان کی بھی یہی سوچ اور فکر ہے۔

فیاض الحسن چوہان نے مزید کہا کہ بلدیہ راولپنڈی کو دی گئی ہدایات کے مطابق جائے شہادت پر تعمیر کا کام مکمل کر دیا گیا ہے۔

اس سے قبل پیپلز پارٹی کے رہنما رحمان ملک نے میڈیا سے گفتگو کرتے ہوئے کہا تھا کہ آصف علی زرداری سیاسی طور پر ایکٹیو ہوئے اور انکے ایکٹیو ہونے پر مخالفین کے پیٹ میں درد ہو رہا ہے۔

انہوں نے کہا تھاکہ پیپلز پارٹی مضبوط طور پر ابھر کر سامنے آرہی ہے، بے نظیر بھٹو پر لیاقت باغ سے پہلے بھی حملے ہوئے، ان کے قتل کے تانے بانے بیرون ملک بھی جاتے ہیں۔

سابق وزیرِ داخلہ کا کہنا تھا کہ حکومت کی نااہلی بھی محترمہ کے قتل میں شامل تھی، محترمہ بے نظیر بھٹو کو سیکیورٹی کیوں نہیں دی گئی؟ مجرموں کو سزا ہونی چاہیے۔