فروغ نسیم نےکہا ہے کہ کسی کو خواتین کا حق مارنے کی اجازت نہیں دی جائے گی۔

وفاقی وزیر قانون فروغ نسیم کی زیر صدارت کریمنل لا سے متعلق  جائزہ اجلاس ہوا ، اجلاس کے دوران  تمام صوبوں میں قانون سازی اور اس کے نفاذ  سے متعلق جائزہ لیا گیا۔

اجلاس میں وفاقی وزیر قانون نے خواتین کے وراثتی حقوق کی قانون سازی کے حوالے سے بلوچستان کے نمائندے سے پیشرفت کے حوالے سے دریافت کیا۔

اجلاس کی صدارت کرتے ہوئے فروغ نسیم  نے کہا کہ یہ وہ نیا پاکستان ہے جہاں وراثتی سرٹیفکیٹ کو حاصل کرنا آسان  بنا دیا گیا ہے، وراثتی سرٹیفکیٹ اب صرف چند دنوں میں حاصل کیا جا سکتا ہے۔

وفاقی وزیر قانون نے کہا کہ اپنے معاشرے کو مزید بہتری کی طرف لے کر جانا ہے جہاں کوئی کسی کا حق نہ مار سکے۔

    فروغ نسیم کا کہنا تھا کہ ہمارا دین بھی خواتین کو ان کے مکمل حقوق فراہم کرنے کی تعلیم دیتا ہے۔

ان کا کہنا تھا کہ کسی کو خواتین کا حق مارنے کی اجازت نہیں دی جائے گی، خواتین کو ان کا پورا حق ملنا چاہیے اس حوالے سے قانون سازی جاری رہے گی۔

وفاقی وزیر قانون فروغ نسیم  کا مزید کہنا تھا کہ وکلاء نے اس قانون کی مخالفت کی لیکن ہم نے اس قانون سازی پر کام جاری رکھا، تمام صوبے اس حوالے سے قانون سازی اور اس کے نفاذ کو یقینی بنائیں۔

اجلاس میں پنجاب کے وزیر قانون، بلوچستان اور خیبرپختونخوا کے لا ڈیپارٹمنٹ کے اعلیٰ افسران نے شرکت کی جبکہ اجلاس میں پارلیمانی سیکرٹری برائے قانون و انصاف بیرسٹر ملیکہ علی بخاری اور وزارت قانون کے دیگر افسران بھی شریک ہوئے ۔