وفاقی وزیر نجکاری محمد میاں سومرو نے کہا ہے کہ ہم مقررہ مدت کے اندر نجکاری پروگرام مکمل کرنے کے لیے کوشاں ہیں۔

وفاقی وزیر نجکاری محمد میاں سومرو اور وزیر توانائی حماد اظہر نے اجلاس کی مشترکہ صدارت کی جس میں پاکستان اسٹیل ملز اور ہیوی الیکٹریکل کمپلیکس کی نجکاری سے متعلق معاملات پر غور کیا گیا۔

اجلاس میں سوئی سدرن گیس کی جانب سے پاکستان اسٹیل ملز کے واجبات کی ادائیگی کے لائحہ عمل پر بریفنگ دی گئی۔

وفاقی وزیر توانائی کو کابینہ کے فیصلے سے متعلق آگاہ کیا گیا۔

حماد اظہر کا اجلاس میں کہنا تھا کہ اسٹیل ملز کی بحالی کے لیے منظور شدہ اسٹرکچر کے تحت ذیلی کمپنی کو یوٹیلیٹی کنکشنز کی فراہمی ضروری ہے۔

وزیر توانائی نے کہا کہ سوئی سدرن گیس اسٹیل ملز کو این-او-سی فراہمی کرے تاکہ نجکاری/بحالی کا عمل بلا تعطل جاری رہے۔

حماد اظہر نے کہا کہ سوئی سدرن گیس غیر وصول شدہ واجبات کی ادائیگی اور وزارت نجکاری کو این او سی دینے سے متعلق معاملہ اپنے بورڈ کو بھیجے گا اور جلد ہی بورڈ اجلاس میں متعلقہ معاملے کو حل کرے گا۔

اجلاس میں وزیر توانائی کو ہیوی الیکٹریکل کمپلیکس کے لیے ٹائپ ٹیسٹنگ لائسنس میں توسیع کی سفارش پیش کی گئی۔

وزیر نجکاری کا اس موقعے پر کہنا تھا کہ ہم پٹرولیم ڈویژن سے لائسنس میں توسیع کی سفارش کرتے ہیں۔

اجلاس میں مذکورہ معاملہ این ٹی ڈی سی اور کابینہ کمیٹی برائے نجکاری میں رکھنے کی تجویز کی گئی۔

محمد میاں سومرو نے کہا کہ ہم لائسنس میں توسیع ہیوی الیکٹریکل کمپلیکس کی نیلامی سے پہلے چاہتے ہیں۔

بعد ازاں وزیر نجکاری نے پرائیویٹائزیشن پروگرام کے جائزہ اجلاس کی بھی صدارت کی۔

وزیر نجکاری کا کہنا تھا کہ پاکستان اسٹیل ملز کی بحالی کے لیے اعلی پائے کے انٹرنیشنل انویسٹرز نے پری کوالیفائیڈ کیا ہے اور ہم مقررہ مدت کے اندر نجکاری پروگرام مکمل کرنے کے لیے کوشاں ہیں۔

اہم اجلاس میں وفاقی سیکرٹریز برائے نجکاری، پٹرولیم، وزارت انڈسٹریز اور پاور ڈویژن کے سینئر نمائندوں، مالیاتی مشیران، ہیوی الیکٹریکل کمپلیکس اور سوئی سدرن گیس کے نمائندوں نے شرکت کی۔