گوجرانوالہ میں پولیس نے دو ماہ میں مطلوب 82 گینگز کے 691 ملزمان کو گرفتار کرلیا ہے۔

گوجرانوالہ میں سٹی پولیس آفیسرکیپٹن ریٹائرڈ سید حماد عابد نے پریس کانفرنس میں بتایا کہ پولیس نے اے کیٹیگری کے 268 اشتہاری ملزمان گرفتار کرلئے ہیں جبکہ ملزمان سے چار کروڑ 80 لاکھ 26 یزار روپے نقدی بھی برآمد کیے گئے ہیں۔

کیپٹن ریٹائرڈ سید حماد عابد نے کہا کہ ملزمان سے 24 تولے زیورات، 166موٹرسائیکلیں، 17کاریں اور 50 موبائل فونز بھی برآمد کیے گئے ہیں جب کہ پولیس نے 11عدد کلاشن کوف، 31 رائفلیں، 8 عدد بندوقیں، 317 پستولیں اور سینکڑوں گولیاں برآمد کی ہیں۔

سٹی پولیس آفیسر کا کہنا تھا کہ ملزمان سے برآمد کیا گیا سامان مدعیان کے حوالے کردیا گیا ہے۔

ان کا کہنا تھا کہ کھلی کہچیریوں کے اثرات آنا شروع ہو گئے ہیں اور پولیس کے شہریوں کے درمیان رابطے بحال ہونا شروع ہو گئے ہیں۔ جرائم کی روک تھام کیلئے شہر کے داخلی و خارجی راستوں پر کیمرے لگائے جا رہے ہیں۔

انہوں نے کہا کہ قحبہ خانوں کے خلاف بھی موثر کاروائیاں کی جا رہی ہیں، شہر کے تجارتی مراکز میں خواتین گینگ کی جانب سے کی جانیوالی وارداتوں پر کاروائی عمل میں لائی جا رہی ہے جبکہ بھتہ خوری میں ملوث گینگز کیخلاف بھی کاروائی عمل میں لائی جا رہی ہے۔

 انہوں نے مزید کہا کہ تھانوں میں فری اینڈ فئیر مقدمات کا اندراج یقینی بنایا جا رہا ہے تاکہ ہم اپنے شہریوں کے لئے محفوظ معاشرہ قائم کرسکیں۔