پنجاب میں محکمہ لوکل گورنمنٹ نے ترقیاتی کاموں کی ٹیمیں تیار کردیں۔

 تفصیلات کے مطبق محکمہ لوکل گورنمنٹ اینڈ کمیونٹی ڈویلپمنٹ حکومت پنجاب ترقیاتی اسکیموں میں بہترین معیار قائم کرنے کے لیے ٹیمیں تیار کردیں، سیکرٹری بلدیات نورالامین مینگل نے نوٹیفیکیشن جاری کر دیا ہے۔

نورالامین مینگل نے بتایا کہ پنجاب حکومت نے نو ڈویژنز میں جاری منصوبوں کا جائزہ لینے کے لیے ٹیم اے اور ٹیم بی کو ذمہ داریاں بھی سونپ دی ہیں۔

سیکرٹری بلدیات کا کہنا تھا کہ  ٹیم اے راولپنڈی، لاہور، گوجرانولہ اور فیصل آباد ڈویژنز میں جاری ترقیاتی اسکیموں کا جائزہ لے گی جب کہ ٹیم بی ڈی جی خان،سرگودھا،ساہیوال،ملتان اور بہاولپور ڈویژن میں منصوبوں کا وزٹ کرے گی۔

اُن کا کہنا تھا کہ 5ملین سے زائد لاگت کے منصوبوں پر ڈیسٹریکٹس ٹیسٹنگ فارمولا اپلائی کیا جائے گا  جب کہ  پانچ ملین سے کم لاگت کی اسکیموں پر نان ڈیسٹریکٹیو ٹیسٹنگ فارمولا اپلائی ہو گا۔

انہوں نے بتایا کہ ٹیمیں ٹھیکیداروں کو کی گئی ادائیگیوں اور منصوبوں کی ڈیڈ لائن کا بھی جائزہ لیں گی اور ٹیمیں تمام تر ریکارڈ اور تصویری ثبوتوں کے ساتھ ہفتہ وار رپورٹ جمع کروائیں گی۔

انہوں نے مزید کہا کہ تمام اسکیموں کے فائل ورک اور ریکارڈ کو قانونی تقاضوں کے مطابق یقینی بنایا جائے گا اور ترقیاتی اسکیمیں طے شدہ معیار کے مطابق نا ہونے پر متعلقہ لوکل گورنمنٹس کے خلاف ایکشن لیا جائے گا۔

 ٹیم اے میں ایڈیشنل ڈائریکٹر محمد طاہر شیخ، ڈی جی آئی اینڈ ایم لوکل گورنمنٹ، اسسٹنٹ انجینئر ایکس ای این آفس لاہور مسٹر اسد، ڈی ایم او راولپنڈی ابیر ریاض اور اے ڈی ایل جی راولپنڈی ماہم اعجاز شامل ہیں۔

ٹیم بی میں اسسٹنٹ انجینئر پی ایچ کیو علی خضر، اسسٹنٹ ڈائریکٹر پی ایچ کیو مریم مجید اور ڈی جی خان شبانہ رشید شامل ہیں۔