مسلم لیگ ن نے الیکشن کمیشن کے ضابطہ اخلاق کی خلاف ورزی کر دی۔

ذرائع کے مطابق این اے 133 لاہور کے ضمنی انتخاب کے سلسلے میں مسلم لیگ ن نے پولنگ اسٹیشنز کے اوپر امیدوار کی فلیکسز اور بینرز آویزاں کر دئیے ہیں۔

پیپلزپارٹی کے کارکنوں کی جانب سے ضابطہ اخلاق کی خلاف ورزی پر احتجاج بھی کیا گیا، بعد ازاں متعدد پولنگ اسٹیشنز سے پولیس نے ن لیگ کے بینرز اتار دئیے جبکہ متعدد پولنگ اسٹیشنز پرتاحال ن لیگ کے بینرز آویزاں ہیں۔

این اے 133 ضمنی انتخاب؛ پی ٹی آئی کی عوام سے اپیل 

این اے 133 لاہور کے ضمنی انتخاب کے روزتحریک انصاف نے آج پارٹی ووٹرز سے گھروں پر رہنے کی اپیل کی ہے۔

سینیٹراعجاز چوہدری صدر پی ٹی آئی وسطی پنجاب کا کہنا ہےکہ ہمارا ووٹرزگھروں میں رہے گا، ہم نے اپنے ووٹرزکوآج ووٹ کا حق استعمال نہ کرنے کی اپیل کی ہے۔

 صدر پی ٹی آئی وسطی پنجاب نے کہاکہ ہمارا امیدوار میدان میں نہیں ہم کسی کو ووٹ کاسٹ نہیں کریں گے، آج کا الیکشن انتخابی عمل کے نام پر سیاہ دھبہ ہے۔

سینیٹر اعجاز چوہدری نے پیش گوئی کرتے ہوئے مزید کہاکہ بیس فیصد سے کم ووٹ کاسٹ ہو گا۔

حلقے این اے 133 میں ضمنی الیکشن کا آغاز

لاہور کے حلقے این اے 133 میں ضمنی الیکشن کا آغاز ہو گیا۔

 پولنگ کا آغاز صبح 8 بجے شروع ہوا جوکہ شام 5 بجے تک بغیر کسی وقفے کے جاری رہےگی۔

حلقے میں 254 پولنگ اسٹیشنز قائم کئے گئے ہیں جن میں سے 34 حساس اور 21 کو حساس ترین قرار دیا گیا ہے۔

 حلقے این اے 133 میں مجموعی طور پر 11 امیدوار میدان میں ہیں، ن لیگ کی شائستہ پرویز اور پیپلز پارٹی کے اسلم گل میں کڑا مقابلہ متوقع ہے۔

ن لیگ کے پرویز ملک کے انتقال سے خالی  نشست پر ضمنی انتخاب میں پی ٹی آئی کے نامزد امیدوارجمشید اقبال چیمہ اورمسرت چیمہ کاغذات نامزدگی مسترد ہونے پر پہلے ہی مقابلے سے باہر ہو چکے ہیں۔

حلقے میں چار لاکھ  چالیس ہزار سے زائد ووٹرزحق رائے دہی رکھتے ہیں۔

این اے 133 میں ضمنی انتخابات کے دوران کسی ناخوشگوار واقعے سے بچنے کے لیے سیکیور ٹی کے سخت انتظامات لیے گئے ہیں، رینجرز نے علاقے کا کنٹرول سنبھال لیا ہے۔

ایس ایس پی آپریشنز کی نگرانی میں 6 ایس پیز اور 14 ایس ڈی پی اوز فرائض انجام دے رہے ہیں۔