ڈپٹی اسپیکر قاسم خان سوری نے کہا ہے کہ صوبہ بلوچستان کے عوام نے دہشتگردی کے خلاف جنگ میں بے پناہ قربانیاں دی ہیں۔

اسپیکر قومی اسمبلی اسد قیصر اور ڈپٹی اسپیکر قاسم خان سوری نے جناح روڈ کوئٹہ میں ہونے والے دھماکے کی مذمت کی ہے۔

اسپیکر اور ڈپٹی اسپیکر نے دھماکے کے نتیجے میں قیمتی انسانی جانوں کے نقصان پر گہرے دکھ اور افسوس کا اظہار بھی کیا ہے۔

انہوں نے زخمی ہونے والے افراد کو بروقت طبی سہولیات کی فراہمی کی ہدایت بھی دی ہے۔

ڈپٹی اسپیکر قاسم خان سوری نے کہا کہ دھماکہ دشمن کا ملکی امن کو سبوتاژ کرنے کی مذموم کوشش ہے۔

انکا کہنا ہے کہ قانون نفاذ کرنے والے اداروں ملک میں دہشت اور بدامی پھلانے والے عناصر کو گرفتار کر کے قانون کے مطابق سخت سے سخت سزا دیں۔

اسپیکر اور ڈپٹی اسپیکر نے دھماکے کے نتیجے میں شہید ہونے والے افراد کے درجات کی بلندی اور پسماندگاں کو اس ناقابل تلافی نقصان کو برداشت کرنے کے لیے صبر جمیل عطاء فرمانے اور زخموں کی جلد صحتیابی کے لیے دعا کی ہے۔

واضح رہے کہ کوئٹہ میں جناح روڈ پر سائنس کالج کے قریب دھماکہ ہوا جس کے نتیجے میں 4 افراد جاں بحق اور 15 زخمی ہوگئے۔

دھماکے کے بعد ریسکیو ٹیموں کو اطلاع دی گئی جنہوں نے موقع پر پہنچ کر زخمیوں کو اسپتال منتقل کردیا جہاں زخمیوں کو طبی امداد فراہم کی جاری تھی۔

پولیس کا کہنا تھا کہ دھماکا ایک گاڑی کے قریب  ہوا تاہم دھماکے کی نوعیت کا تعین کیا جارہا تھا جب کہ علاقے کو گھیرے میں بھی لے لیا تھا۔