ستار بچانی نے کہا ہے کہ مقامی انتظامیہ کو ٹنڈوالہ یار شہر کا ماحول خراب کرنے سے روکا جائے۔

پیپلز پارٹی کے سابق ایم این اے ستار بچانی نے وزیر اعلیٰ سندھ مراد علی شاہ سے ٹنڈوالہ یار کی صورتحال پر ٹیلیفونک رابطہ کیا اور شہر کی امن و امان کی صورتحال سے آگاہ کیا۔

ستار بچانی کا اس موقعے پر کہنا تھا کہ کل جو چند شرپسند عناصروں نے ٹنڈوالہ یار کا ماحول خراب کرنے کی کوشش کی ہے، اس کے بعد پولیس شرپسندوں کے ساتھ بیگناہ افراد کو بھی گرفتار کر رہی ہے جن کو فلفور رہاء کروایا جائے۔

ان کا کہنا تھا کہ میں خانزادہ برادری کے پاس فاتحہ خوانی پر گیا وہاں پر موجود خانزادہ برادری کے لوگوں نے بھی شکایت کی ہے۔

انہوں نے کہا کہ کچھ لوگ لسانی فسادات کروانا چاہتے ہیں اور انتظامیہ کے اس عمل سے اس چیز کو ہوا ملے گی۔

سید مراد علی شاہ نے یقین دہانی کراتے ہوئے کہا کہ تمام بیگناہ افراد کو رہا کروایا جائے گا۔

ان کا مزید کہنا تھا کہ ڈی آئی جی حیدرآباد آپ سے رابطے میں آئیں گے اور شہر کے امن و امان کو برقرار رکھنے میں آپ کے ساتھ ہر ممکن تعاون کریں گے۔