خیبر پختونخوا کے شہر ڈیرہ اسماعیل خان میں مغل کوٹ کے قریب خوفناک تصادم ہوا۔

تفصیلات کے مطابق ڈیرہ اسماعیل خان میں بس اور ویگن آپس میں ٹکرا گئیں جس کے باعث 2 افراد جاں بحق اور 15 کے قریب زخمی ہوگئے۔

پولیس ذرائع کا کہنا ہے کہ بس کوئٹہ سے اسلام آباد جا رہی تھی۔

پولیس ذرائع کا مزید کہنا ہے کہ زخمی اور جاں بحق افراد کو تحصیل ہیڈ کوارٹر اسپتال درازندہ منتقل کیا جارہا ہے۔

واضح رہے کہ دنیا بھر میں ٹریفک حادثے انسانی جانوں کے لیے ایک بڑے خطرے کے طور پر سامنے آ رہے ہیں، عالمی ادارہ صحت کے مطابق ہر سال لاکھوں افراد ٹریفک حادثات کی وجہ سے اپنی جانوں سے ہاتھ دھو بیٹھتے ہیں۔

ایک عالمی تحقیقاتی ادارے کے مطابق پاکستان میں ہلاکتوں کا باعث بننے والے پچاس عوامل اوربیماریوں میں ٹریفک حادثات پندرہویں نمبر پر ہیں۔

 پاکستان میں ایڈز، ناقص خوراک،  مرگی، تشدد کئی قسم کے سرطان اور خود کشیوں کی وجہ سے انفرادی طور پر ہونے والی اموات سے ٹریفک حادثات میں مرنے والے لوگوں کی تعداد زیادہ ہے۔

اس رپورٹ کے مطابق سب سے زیادہ ٹریفک حادثات موٹر سائیکل سواروں آٹو رکشا والوں اور موٹر کاروں اور وینز چلانے والوں کو پیش آئے اس کے بعد بسوں اور ٹرکوں کے حادثات رپورٹ ہوئے ہیں۔