پاکستان اور بھارت کے درمیان جوہری تنصیبات اور سہولیات  سمیت قیدیوں کی فہرستوں کا تبادلہ کیا گیا ہے۔

ترجمان دفتر خارجہ کے مطابق پاکستان میں جوہری تنصیبات  کی فہرست باضابطہ طور پر بھارتی ہائی کمیشن کے حوالے کر دی گئی ہے۔

ترجمان نے بتایا کہ نئی دہلی میں بھارتی وزارت خارجہ نے بھارتی جوہری تنصیبات  کی فہرست پاکستانی ہائی کمیشن کے نمائندے کے حوالے کی۔

ترجمان دفتر خارجہ کا مزید کہنا ہے کہ  پاکستان اور بھارت کے درمیان قیدیوں کی فہرستوں کا تبادلہ بھی کیا گیا ہے۔

حکومت پاکستان نے بھارتی ہائی کمیشن کے ساتھ پاکستان میں 628 بھارتی قیدیوں کی فہرست شیئر کی ہے۔ بھارتی قیدیوں میں51 شہری اور 577 ماہی گیر شامل ہیں۔

بھارتی حکومت نے بھی بھارت میں 355 پاکستانی قیدیوں کی فہرست پاکستانی ہائی کمیشن کے حوالے کی ہے۔بھارت میں 282 پاکستانی شہری اور 73 ماہی گیر قید میں ہیں۔

ترجمان دفتر خارجہ کا کہنا ہے کہ 21 مئی 2008  کو ہونے والے پاکستان اور بھارت کے درمیان قونصلر رسائی کے معاہدے کے تحت قیدیوں کی تفصیلات کا تبادلہ کیا گیا ہے۔

معاہدے کے تحت دونوں ممالک کو سال میں دو بارایک دوسرے کی تحویل میں قیدیوں کی فہرستوں کا تبادلہ کرنا ہوتا ہے۔

واضح رہے کہ   دونوں ممالک ہر سال یکم جنوری کو معاہدے کے مطابق ایک دوسرے کو اپنی جوہری تنصیبات اور سہولیات سے  بھی آگاہ کرتے ہیں۔