شہر قائد میں گیس کا بحران شدت اختیار کر گیا ہے۔

کورنگی کے بعد شاہ فیصل کالونی میں بھی گیس بحران کی وجہ سے علاقہ مکین سڑکوں پر نکل آئے ہیں اور احتجاج کرتے ہوئے روڈ بلاک کر دیے ہیں۔

مشتعل مظاہرین نے سڑک پر ٹائر نذر آتش کر دیے ہیں۔

مظاہرین کا کہنا ہے کہ چھٹی کے روز بھی علاقے میں گیس فراہم نہیں کی جا رہی۔

شہر کے بیشتر علاقوں میں گیس کی لوڈ شیڈنگ 22 گھنٹوں تک پہنچ گئی۔ نارتھ کراچی، نارتھ ناظم آباد-بلاک ڈی ایچ، سر سید ٹاون سیکٹر الیون سی 2 اور نارتھ کراچی میں گیس بندش کا دورانیہ 22 گھنٹوں تک پہنچ گیا ہے۔

سوئی سدرن گیس کا کہنا ہے کہ شہر میں گیس کی طلب 1250 ایم ایم سی ایف ڈی اور سپلائی 900 ایم ایم سی ایف ڈی ہے، شہر کو 350 ایم ایم سی ایف ڈی گیس کمی کا سامنا ہے۔

ادارے نے کہا کہ گیس لیکج اور پریشر کی کمی کی وجہ سے گیس کی  لوڈ شیڈنگ اور بندش کی جا رہی ہے۔

سوئی سدرن گیس کے مطابق سوئی سدرن کو بھٹ اور ساون گیس فیلڈز سے 40 ایم ایم سی ایف دی گیس کی کمی کا سامنا ہے۔

ادارے کا کہنا ہے کہ یہ کمی تکنیکی مسائل کی وجہ سے ہے جو سوئی سدرن گیس کے نظام کو بری طرح متاثر کر رہی ہے۔

سوئی سدرن گیس کا مزید کہنا تھا کہ انتظامیہ صورتحال پر نظر رکھے ہوئے ہے اور فیلڈ آپریٹرز کے ساتھ براہ راست رابطے میں ہے۔

واضح رہے کہ اس سے قبل کورنگی کے مکینوں کی جانب سے بھی گیس کی بندش کے خلاف احتجاج کیا گیا تھا۔