بیرون ملک سے کراچی ایئرپورٹ پہنچنے والے 18 مسافروں کے کورونا وائرس مثبت آگئے ہیں۔

ایئرپورٹ ذرائع کا کہنا ہے کہ 16 مسافر پی آئی اے کی پرواز پی کے 9732 کے ذریعے سعودی دارالحکومت جدہ سے کراچی پہنچے جبکہ مثبت آنے والے 2 مسافر امارات ایئرلائن کی پرواز ای کے 600 کے ذریعے دبئی سے پہنچے ہیں۔

ذرائع کے مطابق مسافروں کا کراچی ایئرپورٹ پہنچنے پر ریپڈ اینٹیجن ٹیسٹ کیا گیا تو کورونا مثبت آیا، مثبت کورونا آنے والے مسافروں کو 17 مرد اور ایک خاتون مسافر شامل ہے۔

ایئرپورٹ ذرائع کا مزید کہنا ہے کہ تمام مثبت آنے والے مسافر اپنے گھروں میں 10 روز کے لیے لازمی قرنطینہ کے لیے روانہ کردیا گیا، این سی او سی کی ہدایت کے بعد مثبت کورونا والے مسافر گھروں میں قرنطینہ کرینگے۔

دوسری جانب بیرون ملک سے پاکستان کے ایئرپورٹس پر پہنچنے والے مسافروں کے لیے نئی ہدایت جاری کردی گئی ہے۔

سی اے اے حکام کے مطابق مثبت کورونا والے مسافر ہوم کورنٹائن سے متعلق حلف نامہ جمع کرانے کے پابند ہونگے۔

سی اے اے حکام کا کہنا ہے کہ مسافروں کی سہولت کے لیے حلف نامہ انگریزی اور اردو میں جاری کردیا گیا، بیرون ملک سے پاکستان پہنچنے پر ریپڈ ٹیسٹ کے ذریعے مثبت کورونا والے مسافر گھروں میں قرنطینہ کرینگے۔

سی اے اے حکام کا مزید کہنا ہے کہ این سی او سی کی طرف سے ملک بھر کے ایرپورٹس پر مسافروں سے لازمی حلف نامہ لیا جائے گا۔