وزیر توانائی ڈاکٹر اختر ملک نے کہا ہے کہ ہم پنجاب میں ہزاروں اسکولوں اور ہیلتھ مراکز کو سولر انرجی پر منتقل کر چکے ہیں۔

قومی پالیسی برائے انرجی ایفیشنسی اور کنزرویشن کے موضوع پر مشاورتی اجلاس کا انعقاد ہوا جس میں صوبائی وزیر برائے توانائی ڈاکٹر محمد اختر ملک نے بحیثیت مہمان خصوصی شرکت کی۔

ڈاکٹر محمد اختر ملک کا اس موقعے پر کہنا تھا کہ پالیسی کا مقصد ملک میں توانائی کے استعمال کو بہتر بنانا ہے، 2030 تک تقریبا 9 ملین ٹن تیل کے برابر توانائی محفوظ کرنے کے اہداف حاصل کرنے کے لیے کوشش کر رہے ہیں۔

ان کا کہنا تھا کہ پنجاب میں توانائی سیکٹر کی بہتری کے لیے جامع حکمت عملی پر عمل پیرا ہیں، توانائی کے متبادل ذرائع کے فروغ کے لیے اقدامات کر رہے ہیں۔

انہوں نے کہا کہ پنجاب میں انرجی ایفیشنسی کے صرف چار منصوبوں میں 46 ملین روپے کی بچت ہوئی، توانائی کے متبادل ذرائع کا فروغ ہماری اولین ترجیح ہے۔

ڈاکٹر اختر ملک کا کہنا تھا کہ توانائی سیکٹر میں ٹیکنیکل اسٹاف کی کمی  پورا کرنے کے لیے سینٹر آف ایکسیلنس قائم کیا ہے اور دو مزید سینٹر آف ایکسیلنس اس سال کے اختتام تک مکمل ہو جائیں گے۔

وزیر توانائی نے کہا کہ سابقہ ادوار میں بجلی کے مہنگے پروجیکٹ لگائے گئے، ہم روشن اور خوشحال پنجاب کے لیے جدوجہد کر رہے ہیں۔